პრორუსული პარტიის, პატრიოტთა ალიანსის დეპუტატმა, გიორგი ლომაიამ განაცხადა, რომ ქართულ ოცნებასთან კოალიციის შექმნა შესაძლებელია, თუ პარლამენტში ამ პარტიიდან "მათთვის მოსაწონი" ადამიანები იქნებიან.

"შევხედავთ იმ ახალ ქართულ ოცნებაში, პარლამენტში, თუ იქ იქნებიან ის ადამიანები, ვინც ჩვენთან ერთად იბრძოდნენ 9 წლის განმავლობაში, რა თქმა უნდა, იმ ხალხთან ჩვენ შევქმნით კოალიციას, მაგრამ თუ იქ იქნებიან "სოროსელები" და "მაკკეინის ფონდის დაფინანსებულები" და ა.შ., რა თქმა უნდა, ჩვენ მათთან არანაირი საერთო არ გვექნება", — განაცხადა ლომაიამ.

1 სექტემბერს ქართული ოცნების აღმასრულებელმა მდივანმა, ირაკლი კობახიძემ განაცხადა, რომ ისინი პატრიოტთა ალიანსთან კოალიციის შექმნას თეორიულადაც გამორიცხავენ.

ბოლო პერიოდში პატრიოტთა ალიანსს აქტიურად აკრიტიკებენ, როგორც მმართველ გუნდში, ასევე, ოპოზიციასა და სამოქალაქო საზოგადოებაში. ამის მიზეზი თავდაპირველად ალიანსის ლიდერების ოკუპირებულ რეგიონში ვიზიტი გახდა, რასაც მოყვა ცენტ დოსიეს გამოძიება იმის შესახებ, რომ პარტია კრემლიდან ფინანსდება. მალევე, აჭარაში გამოჩნდა ალიანსის ბანერები, რომელზეც აჭარა ოკუპირებულ რეგიონად იყო მითითებული.

ერთიანი ნაციონალური მოძრაობის წევრმა, თინა ბოკუჩავამ განაცხადა, რომ საკითხით უნდა დაინტერესდეს პროკურატურა და პარტია უნდა მოიხსნას არჩევნებიდან, ვინაიდან მათ მიერ ჩადენილი ქმედება ეწინააღმდეგება საქართველოს კანონს. პარტიის არჩევნებიდან მოხსნაზე საუბრობდა ევროპული საქართველოს წევრი, სერგი კაპანაძეც და განაცხადა, რომ აღნიშნული საკითხი ქართული ოცნების ქმედების შესწავლის საფუძველიც უნდა გახდეს.