მაღალი დონის სპიკერები და მშვიდობისა და უსაფრთხოების პოლიტიკის პრაქტიკოსები ხუთდღიანი კურსისთვის — ლიდერობა მშვიდობისთვის, კონფლიქტების ანალიზის, მოგვარებისა და მართვის გზით — საქართველოში იკრიბებიან. კურსის ფარგლებში 20-ზე მეტ მონაწილეს საჯარო სექტორიდან, არასამთავრობო ორგანიზაციებიდან და აკადემიური წრეებიდან, ექნება უნიკალური შესაძლებლობა, შეიძინონ ცოდნა და უნარები პოლიტიკის სფეროში სათანადო რეაგირებისა და გადაწყვეტილების მოძებნის კუთხით.

ეს კურსი არის ფონდის ევროპული მომავლისთვის (FEF) და ჟენევის უსაფრთხოების პოლიტიკის ცენტრის (GCSP) ერთობლივი ინიციატივა: თანამშრომლობა ჟენევაში დაფუძნებულ ახალგაზრდა საერთაშორისო არასამთავრობო ორგანიზაციას — რომელიც მიზნად ისახავს დემოკრატიის, კანონის უზენაესობის, ადამიანის უფლებებისა და ძირითადი თავისუფლებების პოპულარიზაციას და კონსოლიდაციას საქართველოში — და საერთაშორისო ფონდს შორის, რომელსაც 25 წლიანი გამოცდილება აქვს განათლების გზით მშვიდობის, უსაფრთხოებისა და სტაბილურობის განვითარებაში.

ჟენევის უსაფრთხოების პოლიტიკის ცენტრის (GCSP) დირექტორის, ელჩი კრისტიან დუსეის თქმით, "დღევანდელ კრიზისებსა და გაურკვევლობებთან, ისევე როგორც ხვალინდელ გამოწვევებთან გასამკლავებლად, სასიცოცხლოდ მნიშვნელოვანია ახლანდელი და მომავალი ლიდერების მშვიდობისთვის გაძლიერება".

კურსი რვა მოდულისგან შედგება და მოიცავს ისეთ თემებს, როგორიცაა: ლიდერობა მშვიდობისთვის; კონფლიქტების ანალიზი, მათი მოგვარება და მედიაცია; კონფლიქტების მენეჯმენტი, სამშვიდობო ოპერაციები, მშვიდობის მშენებლობა; კარგი მმართველობა; ხვალინდელი ჰუმანიზაცია — ადამიანის უფლებები, გარდამავალი სამართლიანობა, წარსულის გააზრება და ლიდერობის ოპერატიზაცია მშვიდობისათვის — თეორიის პრაქტიკაში გამოყენება.

კურსის ერთ-ერთი უპირატესობა ისაა, რომ ექსპერტიზის მაღალ დონესთან ერთად, ის აერთიანებს თეორიულ და პრაქტიკულ მიდგომებს. ამისათვის ფონდმა ევროპული მომავლისთვის (FEF) და ჟენევის უსაფრთხოების პოლიტიკის ცენტრმა (GCSP) გამოცდილი პროფესიონალების გუნდი შეკრიბეს, მათ შორის — ჟენევის უსაფრთხოების პოლიტიკის ცენტრის (GCSP) იარაღის უკანონო გავრცელების მიმართულების ხელმძღვანელი, მარკ ფინო; ფონდი ევროპული მომავლისთვის (FEF) დამფუძნებელი, თეონა თელია და საქართველოს საგარეო საქმეთა მინისტრის მოადგილე, ლაშა დარსალია, ისევე როგორც გაეროს გენერალური მდივნის ყოფილი თანაშემწე, ჩარლზ პეტრი და სხვები.

კურსი 23-27 აგვისტოს, შატო შუხმანში ჩატარდება. ხოლო დახურვისა და სერტიფიკატების გადაცემის ცერემონია, საქართველოს შვეიცარიის საელჩოში მიღებისას გაიმართება.