ინგლისელი პროდიუსერი და მუსიკოსი Låpsley თბილისს გადამღებ ჯგუფთან ერთად ეწვია და ქალაქის ღამის ცხოვრებაზე არაჩვეულებრივი მინი დოკუმენტური ფილმი შექმნა. 15-წუთიან ნამუშევარში მიმოხილულია თანამედროვე ქართული ელექტრონული მუსიკა და მისი წარსული, საკლუბო ცხოვრების გამორჩეული სივრცეები და აქტუალური საკითხი - მოძრაობა ნარკოტიკების დეკრიმინალიზაციისთვის. კადრში ელექტრონული მუსიკის მოყვარულებისთვის კარგად ნაცნობი ადგილები მოხვდა: ხიდი, მტკვარზე, კაფე გალერი და ბასიანი, რომელსაც ავტორი თბილისური ქლაბინგის მექას უწოდებს.

დოკუმენტური ფილმი ტურისტებისთვის მიმზიდველი ადგილიდან - მშრალი ხიდიდან იწყება, სადაც Låpsley ძველ გრამაფონს პოულობს და დები იშხნელების სიმღერით მონუსხული თბილისური თავგადასავლებისკენ იწვევს მაყურებელს. სიმღერის ფონზე იშლება პანორამა საბჭოთა შენობებით, ნელ-ნელა ძველ მელოდიას თანამედროვე ელექტრონული მუსიკა ანაცვლებს და საკლუბო ცხოვრებაზე სასაუბროდ შესაბამისი განწყობა იქმნება.

თბილისში ყოფნის დროს გადამღები ჯგუფი შეხვდა მუსიკოსებს, პროდიუსერებსა და აქტივისტებს, რომლებიც, Låpsley-ის თქმით, საკუთარ პროტესტს მიწისქვეშა, საბჭოთა არქიტექტურით გარემოცულ "დენსფლორზე" გამოხატავენ.

დოკუმენტურ ფილმში ბრიტანელი მუსიკოსი 90-იან წლებს, ადამიანის უფლებებსა და სოციალურ ფონსაც ეხება. მრავალფეროვანი გადასაღები წერტილები, იშვიათი კადრები წარსულიდან და ტურისტის თვალით დანახული თბილისური გართობა - ამ ყველაფრის გათვალისწინებით, ფილმი ქართველი მაყურებლისთვისაც საინტერესო უნდა იყოს.