საქართველოს პრეზიდენტი, სალომე ზურაბიშვილი, გაეროს უშიშროების საბჭოს სხდომის შემდეგ, 8 ქვეყნის მიერ საქართველოს შესახებ გავრცელებულ განცხადებას გამოეხმაურა და მადლობა გადაუხადა საერთაშორისო საზოგადოებას, საქართველოს მეგობრებსა და პარტნიორებს.

"მინდა გამოვეხმაურო ჩვენს მეგობრებს, პარტნიორებსა და ჩვენს სტრატეგიულ პარტნიორს, ყველა იმ ქვყენას, ვინც ეს განცხადება მიიღო გაეროში, ან ცალკე ტვიტერზე გამოგვეხმაურა; ვისაც არ ავიწყდება 2008 წლის ომი, ვისაც არ ავიწყდება საქართველოს ოკუპირებული ტერიტორიები. მადლობა ყველას! ეს იმის ნიშანია, რომ არც ჩვენ და არც მსოფლიო ამას არ ეგუება და მსოფლიო საქართველოს გვერდით დგას.
ეს იმას ნიშნავს, რომ ჩვენ გვაქვს კიდევ უფრო დიდი პასუხისმგებლობა, მოვძებნოთ ის გზები, რომლებიც გააერთიანებს საქართველოს და რომლებიც ამ ყველაფერს ისტორიის ფურცლებზე გადაიტანს", — აღნიშნა საქართველოს პრეზიდენტმა.

გაეროს უშიშროების საბჭოს დახურულ სხდომაზე 2008 წლის აგვისტოს ომის და საქართველოს შესახებ იმსჯელეს.

"მიმდინარე კვირაში, 12 წელი გავა მას შემდეგ, რაც 2008 წლის 7 აგვისტოს, რუსეთსა და საქართველოს შორის კონფლიქტი დაიწყო. გვახსოვს ისინი, ვინც დაიღუპა და ისინი, ვინც საკუთარი სახლი დაკარგა. სინანულს გამოვთქვამთ იმ მცირე პროგრესის გამო, რისი მიღწევაც კონფლიქტის გადასაჭრელად, 2008 წლის 12 აგვისტოსა და რვა სექტემბერის შეთანხმებების შემდეგ მოხერხდა", — გამოცემის ინფორმაციით, სწორედ ასე იწყება გაერთიანებული ერების უშიშროების საბჭოს წევრი ქვეყნების ერთობლივი განცხადება აგვისტოს ომის შესახებ.

მათივე ინფორმაციით, ამ განცხადების მონაწილე საბჭოს წევრი რვა ქვეყანაა: ბელგია, ესტონეთი, საფრანგეთი, გერმანია, აშშ, დიდი ბრიტანეთი, ნორვეგია და ირლანდია.

განცხადებაში ნათქვამია ისიც, რომ წევრი ქვეყნები მხარს უჭერენ საქართველოს დამოუკიდებლობას, სუვერენიტეტს და ტერიტორიულ მთლიანობას მის საერთაშორისოდ აღიარებულ საზღვრებში.

"რუსეთის შეიარაღებული ძალების განგრძობადი ყოფნა საქართველოს რეგიონებში, აფხაზეთსა და "სამხრეთ ოსეთში", ასევე რუსეთის მიერ ამ რეგიონების ე.წ. დამოუკიდებლობის აღიარება, არღვევს საქართველოს ტერიტორიულ მთლიანობას და ძირს უთხრის საქართველოს სუვერენიტეტს, ასევე — საერთაშორისო წესრიგის ნორმებს", — აღნიშნავენ განცხადების ავტორები.

ამერიკის ხმა ასევე იუწყება, რომ განცხადების გამავრცელებელი ქვეყნები შეშფოთებას გამოთქვამენ პანდემიის პირობებში ისედაც უკანონო ბორდერიზაციის პროცესის გაგრძელების გამო. განცხადების ავტორები ასევე მოუწოდებენ რუსეთის ფედერაციას, შეასრულოს 12 აგვისტოს დადებული, 6-პუნქტიანი შეთანხმება ცეცხლის შეწყვეტის შესახებ.