თამარ ბაჩალიაშვილის ოჯახის ადვოკატმა, მიხეილ რამიშვილმა ექსპერტიზის ბიუროდან გამოსვლის შემდეგ განაცხადა, რომ გარდაცვლილის კომპიუტერში საინტერესო ვერაფერი ნახა და კიბერსისტემის მცოდნე ადამიანის კომპიუტერში გაურკვეველი ყვავილების ფოტოების ნახვა არანაირი ინფორმაციის მომცემი არ არის. ის ვარაუდობს, რომ გარკვეული ფაილები შეიძლება წაშლილი იყოს.

"წაშლილი შეიძლება იყოს იქიდან გამომდინარე, რომ არაფერი საინტერესო არ დევს. ისეთი ფოტოებია, გაურკვეველი ყვავილების. [გამოდის, რომ] ადამიანი, რომელიც დასაქმებულია, რომელიც მცოდნეა კომპიუტერული სისტემის, აბსოლუტურად არანაირი ინფორმაციის მფლობელი არ არის", — აცხადებს რამიშვილი.

მისივე თქმით, ფედერალური ბიუროდან დამატებით ექსპერტების ჩართვა აუცილებელია, ვინაიდან საგამოძიებო უწყებები ცდილობენ იმ ვერსიის გამყარებას, რომ თამარ ბაჩალიაშვილმა საქმე თვითმკვლელობამდე მიიყვანა.

"მათი მტკიცებით, 18 ივლისის 10 საათიდან ლეპტოპს არავინ არ გაკარებია. აქედან გამომდინარე ვამბობ, რომ აუცილებლად არის ჩასართველი, ყოველ მიზეზგარეშე, ფედერალური ბიუროდან დამატებითი ექსპერტები", — ამბობს გარდაცვლილის ოჯახის ადვოკატი.

დღეს თამარ ბაჩალიაშვილის ოჯახის წევრებმა და ახლობლებმა FBI-ს ჩართვის მოთხოვნით აშშ-ს საელჩოსთან საპროტესტო აქციაც გამართეს. გარდაცვლილის დედა, თეონა თამაზაშვილი აცხადებს, რომ თუ გამოძიებაში FBI არ ჩაერთვება, აშშ-ს საელჩოს წინ შიმშილობას დაიწყებს.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.

ჯერ კიდევ ძებნის პროცესში გამოძიებამ ამოიღო ბაჩალიაშვილის კომპიუტერი, თუმცა ოჯახი აცხადებდა, რომ მისი გახსნა ვერ შეძლეს. მოგვიანებით კი მამამ მედიასთან თქვა, რომ პოლიციელის თქმით, მისი შვილი "დიდ შარში იყო". ოჯახის ადვოკატი კომპიუტერის გახსნის პროცესზე დასწრებას ითხოვდა, თუმცა, მიხეილ რამიშვილის განცხადებით, ლუქი მის გარეშე მოხსნეს.