როცა ჩრდილოეთ ჩინეთში ფრინველისგრიპისმაგვარ დაავადებას აღმოაჩენენ მტრედებში, ჩრდილოეთ ზღვაში მდებარე ერთ-ერთ იდილიურ კუნძულზე წარმოდგენაც არ აქვთ, რამხელა საფრთხე მიემართება მათკენ.

თუმცა ერთ დღეს ნაპირს სამგზავრო გემი მიადგება, რომლის ბორტზეც ბრიტანელი წყვილის მუმიფიცირებული სხეულებია. მალევე ცნობილი ხდება, რომ გვამებთან ერთად კუნძულზე უცნობი ვირუსიც ჩამოვიდა.

ეს სიუჟეტი შეიძლება COVID-19-ით შთაგონებულ ისტორიად ჩანდეს, თუმცა, რეალურად, დანიურ-გერმანული სატელევიზიო სერიალი, Sløborn, გასულ წელს გადაიღეს, მისი ჩვენება კი გერმანულ არხზე მაშინ დაიწყო, როცა ევროპა და დანარჩენი მსოფლიო ნამდვილ პანდემიას ებრძვის.

სერიალი, რომლის სახელიც სიტყვების თამაშია და "ნელ წვად" ითარგმნება, მოგვითხრობს ამბავს, თუ როგორ ცვლის ვირუსი გამოგონილ კუნძულზე მშვიდ ცხოვრებას ქაოსით და დესტრუქციით.

კუნძულზე მცხოვრებლებს ურჩევენ, რომ ატარონ ნიღაბი და დაიცვან სოციალური დისტანცია. შემუშავდება კარანტინის წესები და უმალ იჩენს თავს კონსპირაციული თეორიებიც ვირუსის წარმოშობის შესახებ.

სერიალის შემქმნელები მას აღწერენ, როგორც "პოსტაპოკალიფსურ უბედურების თრილერს", რომელიც თანამედროვე ეპიკურობითაა გაჟღენთილი, მისი საშუალებით კი შესაძლებელია, გავიგოთ "რა ემართება თანამედროვე საზოგადოებას, როცა პატარა ნაპერწკალიც კი ჩვენი ცივილიზაციის დანგრევის საფუძველი ხდება". იმის გამო, რომ გამოგონილი ისტორია არსებულ რეალობასთან ძალიან ახლოსაა, ტელეკომპანია ZDF სერიალის არგაშვებასაც კი აპირებდა.

"უპირველესად, ის კითხვა გაგვიჩნდა, რამდენად მიზანშეწონილი იქნებოდა ჩვენი მაყურებლისთვის სერიალი ახლა შეგვეთავაზებინა", — ამბობს სერიალის შემქმნელი და რეჟისორი, კრისტიან ალვარტი.

ალვარტი წერის პროცესში ვირუსოლოგებთან და გადაუდებელი დახმარების პერსონალთან გადიოდა კონსულტაციებს, თუ რა გეგმა ჰქონდა გერმანიას იმ შემთხვევაში, თუკი სასიკვდილო ვირუსის პანდემია გაჩნდებოდა. მისი თქმით, შთაგონების წყარო იყო ის მოსაზრება, რომ უბედურებები "მეტწილად სხვაგან ხდება". ამის შემდეგ იგი დაფიქრდა, რა იქნებოდა, თუ ერთ-ერთი უბედურება მასთან ძალიან ახლოს მოხდებოდა.

ბუნდესვერის ქვეითები კუნძულზე ევაკუაციას უზრუნველყოფენ.

ბუნდესვერის ქვეითები კუნძულზე ევაკუაციას უზრუნველყოფენ.

ფოტო: Krzysztof Wiktor/ZDF


"გაოცებული ვიყავი, თუ როგორ გამუდმებით ვიგებთ მედიის საშუალებით მსოფლიოში მომხდარ უბედურებებსა და კატასტროფებზე, თუმცა ჩვენი ცხოვრება მაინც ჩვეულებრივად გრძელდება", — ამბობს იგი.

სერიალის გადაღებები 2019 წლის მიწურულს მიმდინარეობდა აღმოსავლეთ ფრიზის კუნძულ ნორდერნაიზე და პოლონურ საზღვაო კურორტ სოპოტში.

როცა გერმანიაში კარანტინი გამოცხადდა, გადაღებები უკვე დამთავრებული იყო. "ტანში ჟრუანტელმა დამიარა, როცა გავაცნობიერე, რომ ეს ყველაფერი წინა წელს გადავიღეთ", — აღნიშნავს ალვარტი.