უკრაინაში დააკავეს ტერორისტი, რომელმაც ავტობუსში მძევლები აიყვანა. ამის შესახებ ინფორმაცია უკრაინის შინაგან საქმეთა მინისტრმა, ანტონ ავაკოვმა გაავრცელა.

მან გამოაქვეყნა ვიდეო წარწერით: "დასრულდა".

ავაკოვის განცხადებით, ავტობუსში 13 მძევალი იყო. მისივე თქმით, ტერორისტი თავად გამოვიდა ავტობუსიდან რის შემდეგაც სპეცრაზმმა დააკავა.

უკრაინული მედიის ინფორმაციით, ავტობუსზე თავდასხმიდან თითქმის 11-საათის შემდეგ ტერორისტმა 3 მძევალი გაათავისუფლა. დაშავებულებსა და დაკავებულებზე უკრაინულ მედიაში ინფორმაცია არ ვრცელდება.

21 ივლისს დასავლეთ უკრაინის ქალაქ ლუცკში შეიარაღებულმა პირმა ავტობუსი გაიტაცა და მგზავრები და მძღოლი მძევლად აიყვანა. ის ირწმუნებოდაა, რომ შეიარაღებაში ჰქონდა ავტომატური ცეცხლსასროლი იარაღი, ყუმბარები და ავტობუსში განთავსებული იყო ორი ასაფეთქებელი მოწყობილობა. მისივე მტკიცებით, ბომბი ქალაქის ერთ-ერთ ხალხმრავალ ადგილასაც ჰქონდა დამონტაჟებული.

პირმა, რომელიც მაქსიმ პლოხოის სახელით მოქმედებდა მოთხოვნა წაუყენა უკრაინის ხელისუფლებას, რომ 24 საათის განმავლობაში, ეკლესიის იერარქებს, მინისტრებს, სასამართლოსა და პროკურატურის მაღლჩინოსნებსა და პარლამენტის წევრებს გადაეღოთ ვიდეო, ეთქვათ რომ ისინი არიან "კანონიერი ტერორისტები" და განეთავსებინათ სოციალურ ქსელში.