ევროპული საქართველოს ერთ-ერთი ლიდერის, გიგი უგულავას თქმით, საბურთალოზე, მაღალი ალბათობით, ყველა პარტია დააყენებს კანდიდატს, ან ინდივიდუალურად დაუჭრს მხარს. მისივე განცხადებით, დავით სერგეენკო ოპოზიციის მხრიდან საბურთალოს ოლქში რაიმე ცვლილების მიზეზი ვერ იქნება.

"საბურთალოზე, მაღალი ალბათობით, ყველა პარტია დააყენებს კანდიდატს ან ვინმეს ინდივიდუალურად დაუჭერს მხარს.საბურთალო განწირულია მეორე ტურისთვის, განსხვავებით ვაკისგან, სადაც, დარწმუნებული ვარ, რომ პირველივე ტურში ელენე ხოშტარია მოიგებს", — განაცხადა უგულავამ პალიტრანიუსის ეთერში.

სიებთან დაკავშირებით მანვე აღნიშნა, თუ სახელი და გვარი საზოგადოებას არაფერს ეუბნება, მას ელექტორალური წონა არ აქვს.

მისივე თქმით, სავარაუდოდ, ის მაჟორიტარი დეპუტატობის კანდიდატი რეგიონში იქნება, თუმცა რეგიონს ჯერ ვერ ასახელებს.

ოპოზიციურმა ერთობა თბილისში მაჟორიტარობის 6 კანდიდატზეა შეთანხმებული.

ამ ეტაპზე დანარჩენი 2 ოლქის კანდიდატი უცნობია და პოლიტიკოსები აცხადებდნენ, რომ კონსულტაციები გრძელდება. რაც შეეხება 6 ოლქს, კანდიდატები ასე გადანაწილდა:

  • ნაძალადევი — შალვა ნათელაშვილი;
  • მთაწმინდა-კრწანისი — შალვა შავგულიძე;
  • ვაკე — ელენე ხოშტარია;
  • ისანი — გიორგი ვაშაძე;
  • სამგორი — ლევან ხაბეიშვილი
  • გლდანი — ნიკა მელია.