Warner Bros.-მა შესაძლოა, წყევლის მესამე ნაწილის, The Conjuring: The Devil Made Me Do It-ის, გამოსვლის თარიღი სექტემბრიდან 2021 წლამდე გადაწიოს. წყევლის სამყაროს მორიგი ფილმი ტოვებს დაწყევლილი სახლის გარემოცვას და სასამართლოს სხდომის დარბაზში ინაცვლებს. წინა ფილმების მსგავსად, The Devil Made Me Do ეფუძნება ედ და ლორეინ უორენების რეალურ სასამართლო საქმეს. მეტიც, ფილმის მესამე ნაწილის ქვესათაური, სინამდვილეში, უორენების ერთ-ერთი ყველაზე გახმაურებული საქმის სახელია არნ შაიან ჯონსონის მიერ ჩადენილი მკვლელობის შესახებ.

გასაკვირი არაა, რომ ჰოლივუდს კორონავირუსმა დიდი ზიანი მიაყენა. მას შემდეგ, რაც პანდემიის დასაწყისში კინოთეატრები დაიხურა, სტუდიებს თავიანთი ახალი ფილმების პრემიერების გადაწევა მოუწიათ, რაც დღემდე გრძელდება. რამდენიმე კინოთეატრის, მაგალითად, AMC-ს, დაბრუნება ივლისში იგეგმება ისეთი ახალი ფილმებისთვის, როგორებიცაა მულანი და კრისტოფერ ნოლანის Tenet, თუმცა აშშ-ში COVID-19-ის შემთხვევების ბოლოდროინდელი მოჭარბების გამო, შესაძლოა, ესეც შეიცვალოს. ახლა, როგორც ჩანს, წყევლის ახალი ნაწილის ჯერიც დადგა.

Deadline-ის მიხედვით, სიქველს მნიშვნელოვანი დაყოვნება ემუქრება და შესაძლოა, ის, სულაც, 2021 წლამდე გადაიდოს. გამოსვლის ზუსტი თარიღი ჯერ უცნობია, რადგან Warner Bros.-ს ოფიციალურად არ დაუდასტურებია ფილმის პრემიერის გადაწევა.

ფოტო: Warner Bros. Pictures

კომპანიამ დიდ წარმატებას მიაღწია წყევლის ფილმების სერიით და წლების განმავლობაში არაერთი სიქველი და სპინ-ოფი გამოუშვა. წყევლის ფრენჩაიზი ჯერ კიდევ 2013 წელს დაიწყო, თუმცა მას შემდეგ ფილმის მხოლოდ ერთი, პირდაპირი გაგრძელება გამოვიდა. მართალია, ფრენჩაიზის სპინ-ოფებს, Annabelle-სა და The Nun-ს, სხვადასხვაგვარი წარმატება ხვდა წილად, წყევლის ორ მთავარ ფილმს შედარებით კარგად შეხვდნენ ფანები და კრიტიკოსები, Warner Bros.-მა კი მშვენიერ შემოსავალს გამოჰკრა ხელი. ფანები სულმოუთქმელად ელოდნენ ფილმების სერიის ახალ ნაწილს, მაგრამ ახლა უკვე შესაძლოა, რომ მათ მოსალოდნელზე დიდხანს მოუწიოთ ცდა.

თუკი Warner Bros. 2021 წლამდე გადადებს The Conjuring: The Devil Made Me Do It-ის პრემიერას, სავარაუდოა, რომ მის გამოშვების თარიღს კომპანია თავის რომელიმე სხვა ფილმს გადასცემს, მაგალითად, Tenet-ს. კრისტოფერ ნოლანის ახალი ფილმის პრემიერის თარიღი რამდენჯერმე უკვე გადაიწია, თუმცა, კორონავირუსის შემთხვევების ზრდის გათვალისწინებით, ჯერ უცნობია, გადმოიწევს თუ არა ფილმის თარიღი. The Conjuring: The Devil Made Me Do-ის 2021-ის გადაწევა სტუდიას მისცემს იმის თავისუფლებას, რომ ჯერ Tenet გამოსცეს. მართალია, ფანები იმედგაცრუებულები დარჩებიან, თუკი Warner Bros. დაადასტურებს ამ ცვლილებას, მაგრამ არც იმის გარანტია არსებობს, რომ ყველაფერი კვლავ "ნორმალურად" იქნება იმ დროს, რა დროისთვისაც The Conjuring: The Devil Made Me Do It-ის გამოშვება იგეგმება ახლა.