პრეზიდენტად არჩეული დონალდ ტრამპის ადმინისტრაცია წინასაარჩევნო კამპანიის დროს დადებულ მორიგ პირობას არ შეასრულებს.

როგორც ტრამპის კამპანიის ყოფილი მენეჯერი კელაინ კონვეი ამბობს, ტრამპი ჰილარი კლინტონის წინააღმდეგ ე.წ. იმეილების საქმესა და Clinton Foundation-სთან დაკავშირებით, დამატებითი გამოძიების დაწყებას არ აპირებს. ინფორმაციას CNN ავრცელებს.

კონვეიმ დასძინა, რომ, მას შემდეგ, რაც ტრამპი პრეზიდენტად აირჩიეს, მან "ბევრ განსხვავებულ თემაზე" დაიწყო ფიქრი, და რასაც ის კამპანიის დროს აცხადებდა, მათ შორის არაა.

ოქტომბრის დასაწყისში, მეორე საპრეზიდენტო დებატებზე, ტრამპმა კლინტონს უთხრა:

"თუ გავიმარჯვებ, იუსტიციის მინისტრს დავავალებ, რომ პროკურატურამ თავიდან გამოიძიოს შენი სიტუაცია".

თავის მხრივ, არჩევნებში დამარცხებას ჰილარი კლინტონი FBI-ის დირექტორს აბრალებს და მიიჩნევს, რომ არჩევნების დღემდე ცოტა ხნით ადრე, ფედერალური საგამოძიებო ბიურო საარჩევნო პროცესში მისთვის ნეგატიურად ჩაერია, როდესაც 28 ოქტომბერს ახლადაღმოჩენილ იმეილებთან დაკავშირებით, დემოკრატების საპრეზიდენტო კანდიდატის წინააღმდეგ გამოძიება გააგრძელა.

კლინტონის თქმით, არჩევნების წინა დღეს, გამოძიების დირექტორის ჯეიმს კომის განცხადება, რომ ე.წ. იმეილების საქმეში მისი დანაშაული არ იკვეთებოდა, დემოკრატიული პარტიის წინასაარჩევნო კამპანიის შეწყვეტამდე სულ მცირე დროით ადრე მოხდა.