"ჩვენი საიტი უკვე ამუშავდა, გვისურვეთ წარმატებები" — ოთხი წლის წინ ოფიციალურად ამ წინადადებით დაიწყო On.ge-ის ისტორია. მართალია, ჟურნალისტები ნიუსებს მანამდეც დებდნენ ფეიჯზე საცდელ ფორმატში, მაგრამ საიტის გაშვება მაინც შეუდარებლად დიდი ამბავი იყო.

ახლა, 55 912 სტატიის შემდეგ, შეიძლება მოგვეჩვენოს, რომ ბევრად მეტი დრო გავიდა. თითქოს მთელი ცხოვრება ვაშუქებდით არჩევნებსა და აქციებს, ვიგონებდით ქვიზებს და ვფიქრობდით მახვილგონივრულ მინაწერებს, რათა ფეისბუქის უზარმაზარ სივრცეში კონკრეტულად ჩვენი ხმა დაგმახსოვრებოდათ.

რამდენჯერმე ისე დაემთხვა, რომ ჩვენს დაბადების დღეზე ყველაზე ცხელი პოლიტიკური მოვლენები ხდებოდა და ტორტის გასაჭრელად არ გვეცალა. ვხუმრობდით კიდეც, აბა წელს რა შეგვიშლისო ხელს და, მიუხედავად მრავალი ვარიანტის ჩამოთვლისა, გლობალური მასშტაბის პანდემია მაინც ვერ გამოვიცანით.

"იმ საღამოს, ჭავჭავაძის #20-ში, ჩვენს პირველ ოფისში ამოღამებული თვალებით ვისხედით - ერთმანეთს სტატიებზე გამოხმაურებებს და აღწერებს ვუქებდით, კომპლიმენტებს ხმამაღლა ვკითხულობდით, ჯერ კიდევ ვერ ვხვდებოდით, რომ რაღაც ძალიან დიდი და მნიშვნელოვნის შექმნის მონაწილეები ვიყავით. ეგ განცდა დღემდე არ გამნელებია და ერთ-ერთ საამაყო გამოცდილებად დარჩება ჩემი ცხოვრების ბოლომდე" — ასე იხსენებს საიტის გაშვების დღეს ჟურნალის განყოფილების რედაქტორი და ჩვენი ერთ-ერთი პირველი თანამშრომელი, თამარა ღამბაშიძე.

4 წლის წინ თუ ექვსნი ვიყავით, ახლა ჩვიდმეტნი ვართ და ქვეყნის სხვადასხვა წერტილიდან ვმუშაობთ. რაკი ტორტს ერთად ვერ გავჭრიდით, ყველა თანამშრომელმა (ვისაც კი მივწვდით) პატარა ტორტი მიიღო სახლში საჩუქრად იმის გასახსენებლად, რომ დისტანცია ვერაფერს დაგვაკლებს.

On.ge-ის გუნდი

ფოტო: On.ge

მას შემდეგ უამრავი მკითხველი და გულშემატკივარი შევიძინეთ და თითოეულმა მათგანმა ოდნავ უფრო უკეთესი გაგვხადა, ვიდრე ვიყავით და რაკი შენც, როგორც ამ სტატიის მკითხველი, მათ რიცხვში ხარ, გვინდა გითხრათ — მადლობა!