მულანის, ურჩხული და მზეთუნახავისა თუ ალადინის შემდეგ დისნეი თავისი კიდევ ერთი საკულტო ანიმაციის — ჰერკულესის მიხედვით რიმეიქს გადაიღებს.

როგორც უკვე ცნობილია, ახალი ფილმის შექმნაში Avengers-ის რეჟისორები, ძმები რუსოები მიიღებენ მონაწილეობას: ისინი ფილმის მთავარი პროდიუსერები იქნებიან. ფილმის სცენარზე კი დეივ კალაჰანი იმუშავებს, რომელიც აქამდე ისეთი ცნობილი ფილმების სცენარისტი ყოფილა, როგორებიცაა The Expendables, Godzilla და Zombieland: Double Tap.

ჰერკულესი 1997 წელს გამოსული მუსიკალური ანიმაციაა, რომელიც ბერძნული მითოლოგიის მოტივებზე ღვთაებრივი გმირის — ჰერკულესის შესახებ მოგვითრობს. ანიმაციის ძირითადი სიუჟეტური ხაზი სწორედ ამ გმირის ირგვლივ ვითარდება, რომელიც დედამიწაზე ადამიანებთან ერთად ცხოვრობს და მრავალი საშიში დაბრკოლების გადალახვა მოუწევს, რათა დაამტკიცოს, რომ ოლიმპოს მთაზე ღმერთებთან ერთად ცხოვრების ღირსია.

ამ ანიმაციის რეჟისორები რონ კლემენტსი და ჯონ მასკერი არიან, რომელთაც ემოციური სიუჟეტითა და შთამბეჭდავი ვიზუალით შეძლეს მილიონობით მაყურებლის გული მოეგოთ: $85-მილიონიანი ბიუჯეტით კინოგაქირავებაში ჰერკულესის შემოსავლებმა $252 მილიონი შეადგინა.

ჯერჯერობით უცნობია დეტალები სამსახიობო გუნდის შესახებ, თუმცა ცოტა ხნის წინ მომღერალმა არიანა გრანდემ ABC-ისთვის ამ ანიმაციიდან ცნობილი სიმღერის თავისი ვერსია შემოგვთავაზა და ინტერნეტში მომხმარებლები უკვე აქტიურად განიხილავენ მის კანდიდატურას მეგის როლზე.

თქვენ ისურვებდით, რომ სწორედ არიანას განესახიერებინა ახალ ფილმში ჰერკულესის სატრფოს და ერთ-ერთი ყველაზე მომხიბვლელი ანიმაციური გმირის როლი?

ფოტო: Giphy