2016 წლის 16 ნოემბერს საქართველოს საკონსტიტუციო სასამართლომ არსებითად განსახილველად მიიღო მოქალაქეთა პოლიტიკური გაერთიანების საქართველოს პატრიოტთა ალიანსის კონსტიტუციური სარჩელი საქართველოს პარლამენტის წინააღმდეგ.

პატრიოტთა ალიანსი მიიჩნევს, რომ არჩევნებზე მოპოვებული ხმების თანახმად, პარლამენტში მეტი მანდატი ეკუთვნით. პარტია აცხადებს, რომ საქართველოს კონსტიტუციის მე-14 მუხლთან მიმართებით საქართველოს საარჩევნო კოდექსის 125-ე მუხლის მე-8 პუნქტი არაკონსტიტუციურია.

დავით თარხან მოურავმა 25 ოქტომბერს განაცხადა, რომ პარლამენტში მის პარტიას 8 მანდატი ეკუთვნოდა.

საარჩევნო კოდექსის აღნიშნული ნორმა პროპორციული წესით ჩატარებული არჩევნების შედეგად გადაუნაწილებელი მანდატების განაწილების წესს აწესრიგებს. გადაუნაწილებლად მიიჩნევა მანდატები, რომლებიც რჩება 77 მანდატის პოლიტიკური სუბიექტების მიერ მიღებული ხმების პროპორციულად გაყოფისა და მცირემანდატიანი პოლიტიკური სუბიექტებისათვის მანდატების რაოდენობის ექვსამდე შევსების შემდეგ. სადავო წესის თანახმად, გადაუნაწილებელი მანდატები რიგრიგობით გადანაწილდება იმ სუბიექტებზე, რომლებმაც შევსების გარეშე მიიღეს 6 მანდატზე არანაკლები.

პატრიოტთა ალიანსის თქმით, იგი არის სარჩევნო სუბიექტი, რომელმაც პროპორციული წესით ჩატარებულ არჩევნებში მიიღო ამომრჩეველთა 5%-ის მხარდაჭერა, შესაბამისად მის მიერ მიღებული მანდატების რაოდენობა იყო 6-ზე ნაკლები. საქართველოს კონსტიტუციისა და საარჩევნო კოდექსის მოთხოვნების შესაბამისად მას მანდატების რაოდენობა შეევსო ექვსამდე და, შესაბამისად, სადავო ნორმის საფუძველზე იგი აღარ მონაწილეობს გადაუნაწილებელი მანდატების გადანაწილების პროცესში.

მოსარჩელე მიიჩნევს, რომ ყველა საარჩევნო სუბიექტი, რომელმაც გადალახა 5%-ანი ბარიერი, გადაუნაწილებელი მანდატების მიღების მიზნებისათვის არსებითად თანასწორ სუბიექტებს წარმოადგენს, ხოლო სადავო ნორმით დადგენილი წესი მათ გამორიცხავს მანდატების განაწილების პროცესიდან, ამდენად, დისკრიმინაციულია მათ მიმართ.

საკონსტიტუციო სასამართლომ სარჩელი განსახილველად მიიღო, თუმცა არ დააკმაყოფილა მოსარჩელის მოთხოვნა საქმის საბოლოო გადაწყვეტამდე სადავო ნორმის მოქმედების შეჩერების შესახებ.