სახელმწიფო უსაფრთხოების სამსახურის განცხადებით, მთავრობისა და ჯანდაცვის სამინისტროს სახელით ცრუ შეტყობინებები SMS OFFICE-ისა და ემ ეს ჯგუფის სერვისების მეშვეობით გაიგზავნა. მათივე ინფორმაციით, აღნიშნულ კომპანიებიდან ნივთმტკიცებად ამოღებულია კომპიუტერული ტექნიკა, მობილური ტელეფონები და ინფორმაციის შემცველი სხვადასხვა ელექტრო მოწყობილობა.

როგორც უწყებაში აცხადებენ, ამ ეტაპისთვის საქმეზე გამოკითხულია ათეულობით მოწმე და მიმდინარეობს ცრუ შეტყობინებების გავრცელებაში მონაწილე სხვა პირთა დადგენა, მათთან შემდგომი საგამოძიებო მოქმედებების ჩატარების მიზნით. მომხდარზე გამოძიებას საქართველოს სისხლის სამართლის კოდექსის 318-ე მუხლის 1-ლი ნაწილით მიმდინარეობს, რაც საბოტაჟს გულისხმობს.

ერთ-ერთი კომპანია ემ ეს ჯგუფი პაატა ბურჭულაძის შვილებს ეკუთვნით. სწორედ იქ ჩატარდა გუშინ, 18 მარტს ჩხრეკა. კომპანიის ხელმძღვანელმა შუქრი ბურჭულაძემ განაცხადა, რომ კორონავირუსთან დაკავშირებით თანამშრომელმა ცრუ მოკლე ტექსტური შეტყობინებები ხუმრობით გაგზავნა.

"როგორც ჩვენ გავარკვიეთ შიდა მოძიებით, ექვს ნომერზე, თავის ახლობელ 5 თავის ადამიანს მთავრობის ბრენდნეიმით გაუგზავნა SMS-ები. გაუგებრობა მოხდა, ჩვენი თანამშრომელი, უბრალოდ, გაეხუმრა ძაან ცუდად", — განაცხადა მან.

სუსში კი აცხადებენ, რომ აღნიშნული ქმედებით, შეტყობინების გამგზავნები შეეცადნენ მსოფლიოში გამოცხადებული ახალი კორონავირუსის პანდემიის ფონზე, დეზინფორმირების გზით, უარყოფითი ზემოქმედება მოეხდინათ მოსახლეობის ფსიქოლოგიურ მდგომარეობაზე და დაეთესათ პანიკა და ქაოსი, რაც თავის მხრივ ხელს შეუშლიდა სახელმწიფო დაწესებულებებისა და ორგანიზაციების ნორმალურ ფუნქციონირებას.

მომხდარის გამო კომუნიკაციების ეროვნულმა კომისიამ მოუწოდა მობილურ ოპერატორებს, რომ შეზღუდონ ყალბი შეტყობინებების დაგზავნა, წინააღმდეგ შემთხვევებში კი მათ უმკაცრესი ზომებით დაემუქრნენ.