ჩემი თავი ყოველთვის ინტროვერტი მეგონა, მაგრამ როდესაც კორონავირუსის გამო თვითიზოლაციის პასუხისმგებლობა ავიღე, ოთხ კედელს შორის სავალდებულო ყოფნა არც ისე მომეწონა.

თვითიზოლაციის მესამე დღეს ვხვდები, რომ ყველაზე მეტად მხარდაჭერა და ყურადღება მაკლია. ფეისბუქში შემოსულს შეტყობინებებიც არაფერს მეუბნება — ნიუსფიდში ახალი ამბები, სტატუსები, მიმები და ხუმრობები ერთმანეთშია არეული. რამდენიმე ახალი ჯგუფიცაა, მაგრამ ჩემს ინტერესებზე მორგებული - არცერთი.

როცა მთლიანად ამომეწურა იმედი, რომ რამე საინტერესოს ვიპოვიდი, ფეისბუქზე ახალი შეტყობინება გამოჩნდა. მეგობარმა გასაწევრიანებლად მოგიწვია ჯგუფში "ჯგუფი ერთობა". რა უცნაური სახელია, რამე ხალხურ მუსიკალურ ანსამბლზეა?

შევედი, რომ კიდევ ერთი არასასურველი ჯგუფის წევრობისგან ავირიდო თავი და აღარავინ დამამატოს უკან.

მოლოდინი მთლიანად თავდაყირა დადგა, როდესაც ჩემს ენაზე დაწერილი აღწერა დამხვდა:

"ვააა, ეს ვინ მოსულა! გამარჯობა, მეგობარო. რაკი ამ ჯგუფში აღმოჩნდი, ალბათ, თვითიზოლაციაში ხარ, რაც იმას ნიშნავს, რომ ჩვენზე ზრუნავ. შენი პასუხისმგებლობა ნამდვილად სამაგალითოა. ამიტომ, მოდი, დავიწყოთ კაის თქმით — მადლობა, რომ გვაზღვევ!"

საერთოდ სხვა სივრცეში მოვხვდი. შეუმჩნევლად დავინტერესდი და თვალიერება განვაგრძე. ციფრული სივრცის თანაავტორი მეგობრულად მელაპარაკება და მადლობას მიხდის იმისთვის, რომ სახლში ვარ. არადა, ამას ხომ მართლა სხვებისთვის ვაკეთებ? ძლივს ვიღაცამ შენიშნა და დააფასა!

"ესაა ჯგუფი ერთობა, რომელიც, მართალია, ციფრულად, მაგრამ მაინც შესანიშნავად ერთობა", — ვკითხულობ და ვხვდები, რომ ზუსტად იქ მოვხვდი, სადაც მინდოდა.

სხვების პოსტებიც შევამოწმე. მეგობრული, მხიარული გარემოა, შესაბამისი თემებით და ტოპიკებით. ყველაფერი დამხვდა: იუმორი - რომელმაც უცებ დამავიწყა იზოლირებულობის სევდა, მუსიკა, რჩევები მედიტაციაზე, ონლაინ სწავლებაზეც კი იმდენი რამ გავიგე, მთელი დღე რომ მეძებნა, ვერაფერს გავხდებოდი.

როგორც ჩანს ახალი შექმნილი ჯგუფია.

თითქოს მე მელოდებოდა.

ისევ ვსქროლავ ზემოთ და პირველ პოსტს ვწერ:

WOW. პირველი კომენტარი იმაზე სწრაფად მოდის, ვიდრე ჩემს ახალ პროფილის ფოტოზე გულის რეაქცია.

Outlander, When They See Us, High Fidelity... პირველ რჩევას მეორე მოჰყვა, მეორეს მესამე, მესამეს მეოთხე... მუხა მომცემს რკოსა, რკოს მივუტან ღორსა და... ბოლოს მხარდაჭერის ზღვას კომენტარების დაგულებებით ვუმკლავდები. სასწრაფოდ გამოვრბივარ ფეისბუქიდან: ფლიბეგის ყურება უნდა დავიწყო და შთაბეჭდილებები ჯგუფში დავწერო.

სანამ ნეტფლიქსი ჩაიტვირთება, გული ისევ ჯგუფისკენ მიმიწევს, ფეისბუქზე ვბრუნდები და მეგობრებს ვიწვევ.

შენ კი, თუ ჩემსავით აზღვევ მეგობრებს, თვითიზოლაციაში ხარ, წასაკითხი წიგნები, სანახავი სერიალები და ფილმები შემოგელია, ან სულაც უარყოფითმა ემოციებმა შემოგიტიეს, შემოუერთდი ერთობას. აქ იმაზე მეტი გართობა გელოდება, ვიდრე წარმოიდგენდი. ის ნაცნობებიც უნდა დაამატო, რომლებიც თვითიზოლაციის მნიშვნელობას ეჭვქვეშ აყენებენ. მათ ყველაზე მეტად სჭირდებათ იმის ცოდნა, რომ თურმე ერთად ყოფნა თვითიზოლაციაშიც მოსულა.