30 ოქტომბერს, 50 საარჩევნო ოლქში საპარლამენტო არჩევნების მეორე ტური გაიმართება. მეორე ტურში მონაწილეობას იღებს ის ორი კანდიდატი, რომლებმაც პირველ ტურში ყველაზე მეტი ხმა მიიღეს.

მეორე ტურში კანდიდატურა მოხსნეს ნაციონალური მოძრაობის ლიდერმა სანდრა რულოვსმა და თავისუფალი დემოკრატების ყოფილმა თავჯდომარემ ირაკლი ალასანიამ.

ამის მიუხედავად, 30 ოქტომბერს არჩევნებზე მისულ ამომრჩევლებს ბიულეტენებში მათი მონაცემები დახვდებათ.

როგორც ცესკოში On.ge-ს განუცხადეს, მიუხედავად კანდიდატების გადაწყვეტილებისა, კანონმდებლობის შესაბამისად სანდრა რულოვსიც და ირაკლი ალასანიაც 30 ოქტომბრის არჩევნებში ბიულეტენებზე იქნებიან წარმოდგენილნი.

გუშინ ენმ-ს სიის მეორე ნომერმა სანდრა რულოვსმა განაცხადა, რომ არჩევნების მეორე ტურში მონაწილეობას არ მიიღებს. "შეურაცხყოფად ვთვლი მეორე ტურში მონაწილეობას" - განაცხადა მან.

მისი პარტიის არჩევნებში დამარცხების შემდეგ, პოლიტიკიდან წასვლა დააანონსა ირაკლი ალასანიამ. თუმცა ის მეორე ტურში გორში, 41-ე ოლქში ქართული ოცნების კანდიდატს უპირისპირდებოდა.

პირველ ტურში, განმეორებითი კენჭისყრის შემდეგ, სანდრა რულოვსს 44,8% ჰქონდა, ხოლო ედიშერ თოლორაიას ქართული ოცნებიდან 48,63%. მათ შორის სხვაობა 915 ხმა იყო.

რაც შეეხება ირაკლი ალასანიას, მან პირველ ტურში 19,38% მიიღო, ხოლო იოსებ მაკრახიძემ ქართული ოცნებიდან 33,69%.