საპარლამენტო უმრავლესობის წევრი სოფო კილაძე ამბობს, რომ ნაციონალური მოძრაობის მმართველობის შემდეგ პოლიცია სერიოზულად გაჰუმანურდა და სისტემა წლიდან წლამდე ჯანსაღდება. ამის შესახებ მან პალიტრანიუსის ეთერში განაცხადა.

მისივე თქმით, 15 წლის მოზარდის თვითმკვლელობის შემთხვევა სისტემურ რეფორმებში "არ უნდა აგვერიოს".

"ახლა ხელისუფლების მიღწევებზე საუბარი ამ ბავშვს ვერც გააცოცხლებს და ვერ მის ოჯახს დაუბრუნებს მის თავს, მაგრამ რომ დავრჩეთ იგივე რეალობის ფარგლებში, ვერ ვიტყვით, რომ ნაციონალური მოძრაობის დროს რა პოლიციაც იყო, ზუსტად ის პოლიცია არის ახლა. სერიოზულად გაჰუმანურდა მიდგომებიც, სერიოზული ცვლილებები არის, მათ შორის, არასრულწლოვანთა მართლმსაჯულების კუთხით. მე მაქვს სტატისტიკა იმისთვის, რომ სისტემა ჯანსაღდება წლიდან წლამდე. თუმცა, ამ კონკრეტულ ბავშვთან მიმართებით ამ სისტემამ ვერ იმუშავა. ამ მძიმე ტრაგიკულ შემთხვევის ამბავს ნუ ავურევთ ზოგადად სისტემურ რეფორმებში", — განაცხადა სოფო კილაძემ.

15 წლის ბიჭი, რომელიც დაკითხვის შემდეგ კორპუსიდან გადმოხტა, 17 დეკემბერს გარდაიცვალა.

მოზარდის გარდაცვალების საქმეზე გუშინ გამომძიებელი დააკავეს. სახელმწიფო ინსპექტორის, ლონდა თოლორაიას განმარტებით, დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიანა ჩოლოიანი სისხლის სამართლის კოდექსის 335-ე მუხლის ბრალდებით დააკავეს, რაც ჩვენების მიცემის იძულებას გულისხმობს.

ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, სავარაუდოდ, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

შემთხვევა 2019 წლის 11 დეკემბერს მოხდა. მანამდე მოზარდი გვიან ღამით თავისი ყოფილი სკოლის შენობაში შევიდა შიდა და გარე ტერიტორიაზე წარწერები დატოვა. ამასთან დაკავშირებით სკოლამ პოლიციაში დარეკა და გამოძიება დაიწყო.