საქართველოს ელჩი ამერიკის შეერთებულ შტატებში, დავით ბაქრაძე კონგრესმენების კრიტიკულ გზავნილს ეხმაურება და ამბობს, რომ სტრატეგიული პარტნიორობა არის მტკიცე, როგორც არასდროს". ამის შესახებ მან დღეს, 17 დეკემბერს თბილისში, ელჩების კონფერენციის დაწყებამდე ისაუბრა.

"ყოველთვის ყურადღებით ვუსმენთ ჩვენს პარტნიორებს, გვაქვს მჭიდრო თანამშრომლობა მათთან, ტრამპის ადმინისტრაციასთან. გასაგებია, რომ წინააღმდეგობრივი, განსხვავებული გზავნილები ჩადის, თუმცა ჩვენი პარტნიორები ყოველთვის იღებენ ობიექტურ ინფორმაციას ჩვენგან", — თქვა დავით ბაქრაძემ ჟურნალისტებთან საუბრისას.

გუშინ, 16 დეკემბერს კონგრესმენებმა ადამ კინზინგერმა და ჯერალდ ე. კონოლმა საქართველოს პრემიერმინისტრს, გიორგი გახარიას წერილით მიმართეს. მათ პრემიერი პროპორციულ სისტემაზე გადასვლის დაპირების შეუსრულებლობის გამო გააკრიტიკეს. მათივე წერილში აღნიშნულია, რომ გასაპროტესტებლად ქუჩაში გამოსულ ხალხს "მოძალადე ბოროტმოქმედები დაუპირისპირეს".