აქტივისტები, რომლებიც პროპორციულ არჩევნებს ითხოვენ, ხელისუფლებას მადლობას უხდიან. მათი თქმით, ხელისუფლებამ პარლამენტის შესასვლელების რკინის ჯებირებით ჩახერგვით მათი საქმე გააკეთა.

"ჩვენ ხელისუფლებას მივეცით პირობა, რომ სანამ ჩვენი პირობა არ შესრულდებოდა, შევუქმნიდით დისკომფორტს, ყველგან, სადაც იქნებოდნენ. ჩვენი ჩვენი პირობა შევასრულეთ და მათ გადაწყვიტეს თავად მოეხდინათ პარლამენტის ბლოკირება. მადლობა ხელისუფლებას ჩვენი საქმის გაკეთებისთვის", — განუცხადა ერთ-ერთმა აქტივისტმა მთავარ არხს.

დილიდან საკანონმდებლო ორგანოს პიკეტირება იგეგმებოდა, თუმცა პოლიცია ოპოზიციის წევრებს მომზადებული დახვდა. პარლამენტის შენობის ყველა შესასვლელთან პოლიცია მობილიზებულია. საკანონმდელო ორგანოსთან მისასვლელი ყველა გზა რკინის ჯებირებით არის გადაკეტილი.

ფოტო: თამუნა გეგიძე / On.ge

ფოტო: თამუნა გეგიძე / On.ge

ფოტო: თამუნა გეგიძე / On.ge

პარლამენტის პიკეტირება 26 ნოემბერს დაანონსდა. მოქალაქეები, რომლებიც ბიძინა ივანიშვილის დაპირების არშესრულებას აპროტესტებენ თითქმის 10 დღეა აქციას მართავენ. მათ უნდათ, რომ პროპორციულ სისტემაზე გადასვლის კანონპროექტის ჩამგდები მმართველი პარტიის წევრები პარლამენტში არ შეუშვან. პარლამენტის სხდომებს ბოიკოტის ნიშნად არ ესწრება ნაციონალური მოძრაობა, ევროპული საქართველო და სხვა დამოუკიდებელი დეპუტატები.