ზესტაფონში ეტლით მოსარგებლე მერის, გიორგი გოგლიჩიძის არჩევიდან ხუთი თვის თავზეც მერია და საკრებულო ადაპტირებული არაა. მერს შენობის მეორე და მესამე სართულებზე, სადაც საკრებულოა განთავსებული, სხვისი დახმარებით უწევს გადაადგილება.

როგორც ზესტაფონის მერიაში On.ge-ს უთხრეს, შენობის ადაპტირებისთვის მათ ტენდერი გამოაცხადეს, გამარჯვებულმა კომპანიამ კი სართულებს შორის გადაადგილებისთვის შესაბამისი ლიფტი უკვე დაამზადა. ამჟამად კი ლიფტის განთავსებისთვის შესაბამისი ინფრასტრუქტურის მოწყობას იწყებენ. მერიაში ამბობენ, რომ კომპანიას ვალდებულების შესრულებისთვის სამთვიანი ვადა აქვს.

ზესტაფონის მერიის შენობის ადაპტაციაზე საუბარი მაშინ დაიწყო, როდესაც გიორგი გოგლიჩიძემ მიმდინარე წლის 19 მაისს მერიის რიგგარეშე არჩევნებში გაიმარჯვა. მაშინ On.ge-ს უთხრეს, რომ ადაპტირებულია სამსართულიანი შენობის მხოლოდ პირველი სართული. მერი კი დამოუკიდებლად გადაადგილებას მხოლოდ პირველ სართულზე შეძლებდა.

გარდა ამისა, მერიაში განაცხადეს, რომ ადაპტირება ისედაც იგეგმებოდა და ცესკოს შედეგებს კავშირი არ აქვს. მერიაში განმარტეს, რომ მათი მიზანია, შშმ პირებისთვის მთელი შენობა ადაპტირებული იყოს, რათა ნებისმიერმა ადამიანმა შეძლოს გადაადგილება.