ორგანიზაცია საზოგადოება და ბანკების ეკონომისტი, გივი ადეიშვილი ბოლო პერიოდში, ლარის გაუფასურების მიზეზად სხვადასხვა სეზონურ ფაქტორებს ასახელებს და მიიჩნევს, რომ ეროვნული ბანკი კურსის სტაბილურობის შენარჩუნებას ცდილობს. ამის შესახებ მან On.ge-სთან ინტერვიუში ისაუბრა და ინფლაციის კონკრეტული მიზეზები აღწერა:

"მსხვილი ტრანზაქციები, ასევე შექმნილი მოლოდინები, რომლებიც სეზონური ფაქტორებითაა განპირობებული, თუნდაც ისიც, რომ ტურიზმის შემოსავლები კლებულობს ამ თვის პერიოდში. ასევე, თან ერთვის გაზრდილი ხარჯები. ეს ყველაფერი განაპირობებს რომ ბაზარზე გარკვეული ტრანზაქციები ხდება, ბიზნესი იმარაგებს ძველ ვალუტას, რომელიც შეიძლება დასჭირდეს ზამთრის პერიოდში და თავიდან ირიდებს ლარის შემდგომი გაუფასურების რისკებს".

ეკონომისტი ასევე აღნიშნავს, რომ კურსის ცვლილებაზე საარჩევნო გარემომაც იმოქმედა. მისი თქმით, როდესაც ინვესტორებმა თუ ბიზნესის სხვა წარმომადგენლებმა არ იციან თუ რა იქნება სახელმწიფოს პოლიტიკა უახლოეს პერიოდში, შესაბამისად ხდება გარკვეული მოლოდინის ფორმირება, რაც გაცვლით კურსზე აისახება.

გივი ადეიშვილი ფიქრობს, რომ ეროვნული ბანკის მიერ სავალუტო აუქციონზე რამდენიმე მილიონი აშშ დოლარის გაყიდვა გამართლებულია, რადგან ეს ქმედება ხელს უშლის ლარის მკვეთრ დაცემას:

"ეროვნული ბანკის ჩარევა არ არის გამოწვეული რაიმე ფუნდამენტური ფაქტორების ცვლილებით. მე ვფიქრობ, რომ გამართლებულია მათი ქმედება, ვინაიდან წლის დასაწყისში შეივსო სავალუტო რეზერვები და ახლა იყენებენ მათ. აღნიშნული ჩარევა მიმართული არ არის იმისთვის რომ ლარი გამყარდეს, ეს არის იმისთვის რომ ლარი მკვეთრად არ გაუფასურდეს და სტაბილიზაცია შენარჩუნდეს".