#ქალებისვამენ — ამ სახელწოდებით ფეისბუქზე თამთა თოდაძის მხარდასაჭერი კამპანია დაიწყო. თოდაძე თბილისის საკრებულოს დეპუტატს, ილია ჯიშკარიანს სექსუალურ ძალადობაში ადანაშაულებს.

თამთა თოდაძე ამბობს, რომ სავარაუდო ძალადობის დღეს მან დეპუტატთან და რამდენიმე პირთან ერთად ცოტა დალია. ჯიშკარიანი და მისი ადვოკატი, მარიამ კუბლაშვილი ამტკიცებენ, რომ თოდაძე ნასვამი იყო, რის გამოც ტექნიკა დააზიანა და კონფლიქტის ინსცენირება მოაწყო.

კუბლაშვილის სიტყვების შემდეგ ქალები ფოტოებს ავრცელებენ, რომელშიც მათ სასმელი უჭირავთ და სვამენ.

"ვუერთდები #ქალებისვამენ ფლეშმობს. ქალის სიმთვრალე გაუპატიურებას არ ამართლებს", — წერს აქტივისტი თათია სამხარაძე.

სექსუალური ძალადობის საქმე

ძალადობის სავარაუდო მსხვერპლი ყვება, რომ ჯიშკარიანმა მასზე სექსუალური ძალადობა სცადა და როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ საქმეზე გამოძიება სამი მუხლით დაიწყო.

გარდა ამისა, თამთა თოდაძე ამბობს, რომ პოლიცია სავარაუდო დანაშაულის ადგილზე რამდენიმესაათიანი დაგვიანებით მივიდა. მისი თქმით, სავარაუდო დანაშაული დღის ოთხ საათზე მოხდა, ხოლო სამართალდამცავები ადგილზე მხოლოდ ღამის სამ საათზე მივიდნენ და ოთახი უკვე დალაგებული დახვდათ.

თამთა თოდაძის დედა აცხადებს, რომ ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.

თოდაძის თქმით, ჯიშკარიანმა მასზე 30 სექტემბერს იძალადა, თუმცა ამ დრომდე მას დაზარალებული სტატუსი არ ჰქონდა მინიჭებული. ამის მიზეზად პროკურატურა ექსპერტიზის დასკვნის არარსებობას ასახელებდა.

6 ოქტომბერს თოდაძემ მთავარი არხის ეთერში მომხდარზე ღიად ისაუბრა, მეორე დღეს კი პროკურატურასთან მისი მხარდამჭერი აქცია გაიმართა. 8 ოქტომბერს მისმა უფლებადამცველმა პროკურატურა დაზარალებულის სტატუსის მისანიჭებლად ისევ მიმართა, საღამოს კი ცნობილი გახდა, რომ პროკურატურამ ილია ჯიშკარიანს ბრალი წარუდგინა და ქალი დაზარალებულად ცნო.

11 სექტემბერს სექსუალურ ძალადობაში დადანაშაულებულ ილია ჯიშკარიანს სასამართლომ 10 ათასი ლარის ოდენობის გირაო შეუფარდა. მასვე საქმეზე დაკითხულ მოწმეებთან ნებართვის გარეშე კომუნიკაცია და დაზარალებულ თამთა თოდაძესთან მიახლოება აეკრძალა.