თავდაცვის მინისტრმა, ირაკლი ღარიბაშვილმა თქვა, რომ ქართული ოცნების ხელისუფლება ერთადერთია, რომლის პირობებშიც ქვეყანას ტერიტორიები არ დაუკარგავს. ამის შესახებ მან გადაცემაში იმედის ეთერში დღის ქრონიკა თეა სიჭინავასთან ერთად სტუმრობისას ისაუბრა.

ქართული ოცნების ხელისუფლებაში მოსვლიდან შვიდი წლისთავზე ირაკლი ღარიბაშვილმა აღნიშნა, რომ ქვეყანაში არის "უპრეცენდენტოდ" სტაბილური და მშვიდობიანი მმართველობა.

"პირველი პრეცედენტი დაიშვა ჩვენი ხელისუფლების და ბიძინა ივანიშვილის პერიოდში, რომ ჩვენმა ქვეყანამ არ დაკარგა ტერიტორიები. ყველა მმართველის პერიოდში საქართველომ დაკარგა ტერიტორიები. ვერ აარიდა, სახელმწიფოს ჩვენმა წინამორბედებმა ისეთი დიდი ტრაგედია და განსაცდელი, როგორიც ძვირფასი ტერიტორიების დაკარგვაა" — განაცხადა თავდაცვის მინისტრმა.

ირაკლი ღარიბაშვილის თქმით, პირველი ოქტომბერი ეს არის "ქართველი ხალხის ისტორიული გამარჯვება ძალადობასა და უგუნურობაზე".

"რა თქმა უნდა, შეცდომები და გადაცდომები იყო, მაგრამ ვინც არ მუშაობს, შეცდომებს არ უშვებს. რაც მთავრია, ჩვენ ვხედავთ შეცდომებს, ჩვენ ვაანალიზებთ და მივდივართ წინ, ყოველგვარი ზედმეტი გართულებების გარეშე. იმ მმართველებს, რომლებმაც ისეთი დიდი უბედურება ვერ აგვაცილეს, როგორიც ტერიტორიების დაკარგვაა, არავითარი მორალური სამართლებრივი უფლება არ უნდა დავუტოვოთ, ნორმალურ სახელმწიფოში, პოლიტიკაში დარჩენის შესაძლებლობის", — განაცხადა ტელეკომპანია იმედის ეთერში ირაკლი ღარიბაშვილმა.