ექსტრემალური სიცხე იაპონელ ფერმერებს აიძულებს, რომ ღამე იმუშაონ, რადგან დღისით მუშაობა ჯანმრთელობისა და სიცოცხლისთვის საშიშია. DW წერს, რომ მაღალი სიცხე არა მხოლოდ ადამიანზე, არამედ ცხოველებსა და ფრინველებზეც უარყოფითად მოქმედებს.

ყვავილებისა და სატაცურის მწარმოებლებიდან დაწყებული, კვერცხის მწარმოებლებით დამთავრებული — ფერმერები სამუშაო გრაფიკს ცვლიან.

ტოკიოს ჩრდილოეთით, მზის ჩასვლის შემდეგ, 36 წლის მოტოაკი იიჯიმას სათბური ფანარივით ანათებს. ხელოვნური განათების ქვეშ ის ვარდისფერ და ნარინჯისფერ გერბერებს კრეფს. როდესაც გარეთ ტემპერატურა 35 გრადუსს აჭარბებს, სათბურში სიცხემ შესაძლოა 40 გრადუსზე მეტი იყოს.

ფერმერმა ღამით მუშაობა მას შემდეგ დაიწყო, რაც სამი წლის წინ მისმა თანამშრომელმა მზესუმზირას კრეფისასმზის დარტყმა მიიღო.

"თანდათან ღამის ცხოვრების წესზე გადავედით. ეს ჩვენი სხეულის და, საბოლოო ჯამში, ჩვენი სიცოცხლის დაცვას ეხება," — განუცხადა მან Reuters-ს.

იაპონიაში ფერმერთა დაახლოებით 70% სულ მცირე 65 წლისაა, რის გამოც ისინი სიცხის მიმართ განსაკუთრებით მოწყვლადნი არიან. 2024 წელს იაპონიაში ექსტრემალური სიცხის შედეგად 59 აგრომუშაკი გარდაიცვალა — ორჯერ მეტი, ვიდრე 2021 წელს. ყოველი რეკორდულად ცხელი ზაფხული ჯანმრთელობის სერიოზულ რისკს უქმნის ამ დაბერებად დარგს.

ადამიანების გარდა, ექსტრემალური სიცხით ცხოველებიც იტანჯებიან. 33 გრადუს ცელსიუსზე ქათმები ქოშინებენ. 48 წლის ტეცუია უსუბას ქათმის ფერმაში დილის 2:30 საათზე შუქი ავტომატურად ირთვება, რათა 4 400-მა კვერცხისმდებელმა ქათამმა ჭამა იქამდე მოასწროს, სანამ დღის სიცხე მადას დაუკარგავს. მან დამატებითი ვენტილატორები დააყენა, თუნუქის სახურავს წყლით აგრილებს და სასმელ წყალში ლიმონმჟავას ამატებს. ექვსი ზაფხულის წინ უსუბამ სიცხის გამო სამ დღეში 500-ზე მეტი ქათამი დაკარგა. ყველა დამცავი ღონისძიების მიუხედავად, ახლახან კიდევ 130 ქათამი დაეღუპა.

კლიმატის ცვლილებას კოლოსალური ეკონომიკური ზარალიც მოაქვს. Lancet Countdown-ის თანახმად, მხოლოდ იაპონიის სოფლის მეურნეობის სექტორმა 2024 წელს სიცხის გამო დაახლოებით 926 მილიონი სამუშაო საათი დაკარგა. ყველა ინდუსტრიის მასშტაბით, ეკონომიკურმა ზარალმა 46 მილიარდი დოლარი შეადგინა, რაც იაპონიის მშპ-ის დაახლოებით 1%-ია.

გასულ წელს იაპონიის ამინდის ასოციაციის მიერ გამოკითხული 20-დან 50 წლამდე ფერმერების დაახლოებით 60%-მა განაცხადა, რომ თავად გადაუტანია სიცხისგან გამოწვეული ჯანმრთელობის პრობლემა ან იცნობს ადამიანს, რომელსაც ეს დაემართა. ფერმერთა თითქმის 60%-მა სამუშაო საათები დილის უფრო ადრეულ ან საღამოს უფრო გვიან პერიოდზე გადაიტანა.

პრობლემასთან გამკლავებას სახელმწიფოც ცდილობს. 2025 წელს შემოღებული სამუშაო ადგილის ახალი რეგულაციები დამსაქმებლებს ავალდებულებს, განაცხადონ მზის დარტყმის შემთხვევების შესახებ და შეიმუშაონ საგანგებო გეგმები. ამავდროულად, დიდი იმედი მყარდება დრონებზე, რობოტებსა და სხვა ტექნოლოგიებზე, რომლებმაც მაღალი ტემპერატურის პირობებში ფიზიკური შრომა უნდა შეამცირონ. თუმცა, ბევრ ფერმაში სიცხესთან ადაპტაცია კვლავ ხელით შესასრულებელ საქმედ და ტემპერატურის მატებასთან ყოველდღიურ გამოწვევად რჩება.