ბიზნესმენი, ვანო ჩხარტიშვილი ადასტურებს, რომ მამუკა ხაზარაძესთან დავაში ბიძინა ივანიშვილი იყო ჩართული. ამის შესახებ მის განცხადებაშია აღნიშნული, რომელიც ხაზარაძის საპასუხოდ გაავრცელა.

ჩხარტიშვილი ამბობს, რომ ბიძინა ივანიშვილის ამ საქმეში ჩართვა სახელმწიფოებრივი ინტერესებით იყო გამოწვეული და არა საქმის გარჩევის სურვილით.

"ახალი პარტიის დამფუძნებელი თავის პირველ სატელევიზიო გამოსვლაში, სამოქმედო პროგრამის ნაცვლად, 30 წუთი ჩემთან დავაზე რომ იჭორავებს, ეს უკვე სერიოზული პრობლემაა, არანაკლები ვიდრე ის ტყუილები, რომლითაც იგი საზოგადოების შეცდომაში შეყვანას შეეცადა. სააკაშვილთან ალიანსში ბიზნესმენთა დარეკეტებაში მონაწილეობა არ თეთრდება და ვერც ურცხვი ტყუილით გადაიფარება, როგორც ეს წუხელ სცადა ხაზარაძემ. საზოგადოებამ უნდა იცოდეს თუ რეალურად რასთან გვაქვს საქმე და რამდენად იმსახურებს ახალგამომცხვარი პარტიის ცრუპენტელა ლიდერი ნდობას", — აღნიშნავს ჩხარტიშვილი.

მისივე თქმით, ხაზარაძესთან მისი სასამართლო დავა სააკაშვილის დროს მისთვის ფოთის წისქვილკომბონატის და მასთან მიბმული ნავმისადგომის საქმეს ეხებოდა, რომლებიც, მისივე თქმით, მაშინდელმა ხელისუფლებამ ხაზარაძის თიბისი ბანკის მეშვეობით უკანონოდ წაართვა.

"რაც მთავარია, ეს რეკეტი ბანკმა ხელისუფლებასთან შეთანხმებით ჩემი ლონდონში დევნილობის დაწყებიდან მეორე დღესვე დაიწყო. ორივე ეს დავა ერთ მოსამართლესთან იმ უბრალო მიზეზით მოხვდა, რომ დავა ერთ საქმეს ეხებოდა. მე ხაზარაძეს სამართლიანად მოვუგე ორი ინსტანციის სასამართლო, მაგრამ პროცესი შევწყვიტე იმიტომ, რომ საკითხი ორ სუბიექტს შორის დავაზე უფრო დიდი აღმოჩნდა და შეეხო უცხოელ ინვესტორებთან ურთიერთობისა და ქვეყნის საფინანსო სტაბილურობის განმსაზღვრელი ინსტიტუტისადმი ნდობის სახელმწიფოებრივ თემებს. ბატონი ბიძინას ამ საქმეში ჩართვა ზემოდასახელებული სახელმწიფოებრივი ინტერესებით იყო გამოწვეული და არა საქმის გარჩევის სურვილით, როგორადაც სურს ხაზარაძეს საქმე წარმოაჩინოს", — ამბობს ჩხარტიშვილი.

მისივე თქმით, ასევე, გაუგებარია საკონსტიტუციო თემაზე ნარატივიც, ვინაიდან, მისივე თქმით, "მას არაფერში სჭირდება მათი გადაწყვეტილება, რადგან ეს მოქმედებაში ვერ შეზღუდავდა.

"ისევ მე დავთმე და მოგებული საქმე გამოვიტანე სასამართლოდან. არც ვნანობ, რადგან მიუხედავად სამართლიანობისა, დავის გაგრძელება მნიშვნელოვნად დააზიანებდა ბიზნეს გარემოს საქართველოში და გახდებოდა ბიზნესში არასასურველი პროცესების მაპროვიცერებელი. ჩემთვის მთავარი იყო დამემტკიცებინა ჩემი სიმართლე, რაც გავაკეთე კიდეც. მისმა ბანკმა უშუალოდ მისი მონაწილეობით 17 საათზე სრულიად უსაფუძვლოდ მიითვისა ჩემი ქონებები და 5 წუთში სხვა პირზე გადაყიდა, რათა "პატიოსანი მყიდველის" შემოყვანით მითვისებული ქონება გადაემალა", — დასძენს ჩხარტიშვილი.

ის აღნიშნავს, რომ დავა 18 მილიონს ეხებოდა და არა 30-ს.

"იგი დღეს ცდილობს კოლეგა ბიზნესმენების ძარცვაში მონაწილეობის თემა გაუკუღმართებული მოდელირებითა და ტყუილებით დაგვავიწყოს. არ გამოვა, რადგან ასეთი საქმეები მის წარსულში უამრავია. გახმაურებულებიდან საკმარისია დავასახელოთ ელიტელექტრონიქსი, მიტაცებული ლისის ტბა, ფოთის წისქვილკომბინატი და ნავმისადგომები, სხვა არაერთი ქეისი, რომელშიც იგი ბიზნესის ჯალათის როლში მოგვევლინა. ხაზარაძე დღეს მომავლის საშვის აღებას წარსულის გადაწერით ცდილობს. ამაოდ, რადგან საზოგადოებას კარგად ახსოვს, როცა სააკაშვილის რეჟიმი ქართულ ბიზნესს ტოტალურად ატერორებდა და დევნიდა, ის მათთან ერთად იყო და ჩვენი ქონებების მიტაცებით მდიდრდებოდა. უფრო მეტიც, ამ მიმართულებით გამოჩენილი განსაკუთრებული დამსახურებისთვის იგი სააკაშვილმა 2007 წელს ღირსების ორდენითაც კი დააჯილდოვა. სხვისი ქონებების მითვისებაში გასვრილი ხელებით ნათელ მომავალს ვერ ააშენებ, მით უფრო, ვერ უწინამძღვრებ. ჩვენ მზად ვართ, დაინტერესებულ პირებს მივაწოდოთ მასალები ამ დავის დეტალებზე", — წერია ჩხარტიშვილის განცხადებაში.

გუშინ, 12 სექტემბერს TV პირველის გადაცემა რეაქციაში მამუკა ხაზარაძემ თქვა, რომ ვანო ჩხარტიშვილი ბიძინა ივანიშვილის დახმარებით თიბისი ბანკისგან 30 მილიონი დოლარის მიღებას ცდილობდა. მან თქვა, რომ ამ საკითხზე სოლოლაკში ბიძინა ივანიშვილთან და ვანო ჩხარტიშვილთან შეხვედრა ჰქონდა. ამ შეხვედრას კი ყოფილი მთავარი პროკურორი, ირაკლი შოთაძე ესწრებოდა.