adjarasport.com-ის საჩუქარი სპორტის მოყვარულებს: 9 აგვისტოდან ინგლისის პრემიერ ლიგის თამაშები ინტერნეტში, ექსკლუზიურად adjarasport.tv-ზე გავა.

adjarasport.com ინგლისის პრემიერ ლიგის ოფიციალური პარტნიორი გახდა, თანამშრომლობის ფარგლებში ქართველ ფეხბურთის მოყვარულებს მსოფლიოში საუკეთესო ჩემპიონატის თამაშების ხილვა სრულიად უფასოდ შეეძლებათ.

ამ პროექტისთვის სპეციალური პლატფორმა adjarasport.tv შეიქმნა, სადაც ფეხბურთის ქომაგებს არა მარტო თამაშების პირდაპირი რეპორტაჟების ხილვა, არამედ ოფიციალური მიმოხილვების, მატჩების სრული ჩანაწერებისა და სხვა ექსკლუზიური ვიდეოკონტენტის ნახვა შეეძლებათ.

"სპორტის მოყვარულებისთვის მაქსიმალური კომფორტის შექმნა, ჩვენი გუნდისთვის უმნიშვნელოვანესია. ციფრული ტექნოლოგიების ეპოქაში, მნიშვნელოვანია, ადამიანს საშუალება ჰქონდეს, ნებისმიერი თამაში სასურველი მოწყობილობით ნახოს. ყოველწლიურად იზრდება იმ ადამიანების რიცხვი, ვინც სპორტულ ღონისძიებას, მხატვრულ ფილმსა თუ სასურველ სერიალს ინტერნეტით უყურებს. Adjarasport.tv სრულიად უფასო პლატფორმაა, სადაც სპორტის მოყვარულებს ამა თუ იმ დაპირისპირების პირდაპირი რეპორტაჟის ხილვა შეეძლება, ასევე, სურვილისამებრ, გადახვევა ან სრული ჩანაწერის ნახვა. ჩვენს ახალ საიტზე მომხმარებელს საშუალება ექნება, სასურველი თამაში თავად აირჩიოს და არ იყოს სატელევიზიო ბადეზე დამოკიდებული", — განაცხადა ჩვენთან საუბარში adjarasport.com-ის ხელმძღვანელმა ჯუბა გრიგოლიამ.

ინგლისის პრემიერ ლიგა წლებია ფეხბურთში მსოფლიოს წამყვანი საკლუბო ჩემპიონატია. 2018/19 წლების სეზონში პრემიერ ლიგის თამაშები 4 მილიარდზე მეტმა ადამიანმა იხილა და ამ შედეგთან ახლოს არცერთი ჩემპიონატი არაა.

"ამ პროექტის მოსამზადებელი პერიოდი ხანგრძლივი და რთული პროცესი იყო. როგორც იცით, პრემიერ ლიგა მსოფლიოში ყველაზე პოპულარული და შემოსავლიანი საფეხბურთო ჩემპიონატია. ჩვენთვის მნიშვნელოვანი იყო, ახალი წამოწყება ისეთი ჩემპიონატით დაგვეწყო, რომლისადმი ინტერესიც საქართველოში უდიდესია, სადაც ყველაზე მეტი საკლუბო გრანდი თამაშობს და მომხმარებელს საშუალება ჰქონოდა, ყველა თამაში სურვილისამებრ ენახა", —ამბობს ჯუბა გრიგოლია.

Adjarasport.com-ის ახალი ინტერნეტპლატფორმა, adjarasport.tv, მომხმარებელს არამხოლოდ პრემიერ ლიგის თამაშებს სთავაზობს. სპორტის მოყვარულებს ATP-ის უმთავრესი საჩოგბურთო ტურნირების, ნიკოლოზ ბასილაშვილის ყველა დაპირისპირების ხილვა შეუძლიათ.

"adjarasport.tv ქართულ ონლაინსივრცეში ახალი სიტყვაა. პრემიერ ლიგა და ATP-ის ტურნირები კი ამ ყველაფრის დასაწყისია. ჩვენი გუნდი სხვა სპორტული ჩემპიონატების სტრიმინგზეც მუშაობს და მაყურებელი უახლოეს პერიოდში არაერთ სიურპრიზს უნდა ელოდოს", — აცხადებს ჯუბა გრიგოლია.