რუსთავის საკრებულოს თავჯდომარე, ლევან ონიანი "ინგაზე" შეურაცხმყოფელი და სექსისტური კომენტარის გამო ბოდიშს იხდის. გარდა ამისა, მან ბოდიში მოუხადა ჟურნალისტ ინგა გრიგოლიასაც, თუმცა ირწმუნება, რომ სხვა ინგას გულისხმობდა.

"მიუხედავად იმისა, რომ ჩემი მეგობრული ხუმრობა მის ადრესატს საერთოდ არ სწყენია, პირველ რიგში მას ვუხდი ბოდიშს, შექმნილი უხერხულობისთვის. ბოდიშს ვუხდი ჩემს კოლეგებს პარტია ქართული ოცნებიდან, რომლის იმიჯსაც შეეხო ეს აჟიოტაჟი", — წერს საკრებულოს თავმჯდომარე.

თავის პოსტში ლევან ონიანმა ქართული ოცნების მიღწევებსაც გაუსვა ხაზი და აღნიშნა, რომ ამ პარტიამ დააყენა "საქართველო დემოკრატიული განვითარების გზაზე".

"ჰოდა რახან ხანდახან შეცდომებს ვუშვებთ, ქალბატონო ინგა გრიგოლია, ბოდიშს გიხდით თუკი ჩემი დაწერილი კომენტარი საკუთარ შეურაცხყოფად და დისკრიმინაციად მიიღეთ. ბოდიშს გიხდით რადგან პატივს ვცემ ჟურნალისტის პროფესიას და ამაში ჩემი მეგობარი ჟურნალისტები დამეთანხმებიან. ბოდიშს გიხდით როგორც ქალს, რადგან როგორც მამაკაცი, ქალისათვის ბოდიშის მოხდაში ვერაფერს დამამცირებელს ვერ ვხედავ... და აქვე ბოდიშს ვუხდი ჩემს მეუღლეს, რომელიც ამ თვეში კიდევ ერთხელ გახდება დედა და ბოლო დღეებია ჩემს გამო ისმენს უამრავ ლანძღვას და გინებას... იმედს ვიტოვებ, ჩვენს შვილებს ისეთ ქვეყანაში მოუწევთ ცხოვრება, სადაც ადამიანები ერთმანეთს არ უპირისპირდებიან, სადაც მეგობრული მიმოწერები პოლიტიკური სპეკულირების საგანი არ ხდება და სადაც ყველამ იცის თავისი ფუნქცია და ადგილი", — წერს საკრებულოს თავმჯდომარე ფეისბუქზე.

ფაისბუქპოსტი, რომელზეც ონიანმა დააკომენტარა "ინგა ჩივის უკონტაქტო გაუპატიურებისთვის" ჟურნალისტ ინგა გრიგოლიას მისამართით იყო დაწერილი. ონიანმა თქვა, რომ ეს კომენტარი სხვა ინგაზე დაწერა.

11 ივლისს TV პირველის გადაცემა რეაქციის სტუმარი შინაგან საქმეთა მინისტრი, გიორგი გახარია იყო. გადაცემა ჟურნალისტ ინგა გრიგოლიას მიჰყავს.