IDFI-ის ინფორმაციით, 2016 წელს, საჯარო ინფორმაციის ხელმისაწვდომობის შეზღუდვისთვის დაწესებულებების რეკორდულად მაღალი რაოდენობა დასახელდა. ორგანიზაცია წერს, რომ წელს ყველაზე დახურულ საჯარო დაწესებულებად დასახელდა მთლიანად იუსტიციის სამინისტროს სისტემა.

IDFI-მ, 2016 წელს იუსტიციის სამინისტროს სისტემაში შემავალ 12 უწყებას გაუგზავნა 346 მოთხოვნა, საიდანაც პასუხი ვერც ერთზე მიიღეს. შედეგად, იუსტიციის სამინისტროს სისტემის ინფორმაციის ხელმისაწვდომობის ხარისხი 2016 წელს, 2013 წელთან შედარებით, 95.6%-ით გაუარესდა და 0% შეადგინა.

2016 წელს იუსტიციის სამინისტროს სისტემაში შემავალი 12 უწყების გარდა, საქართველოს 294 ადმინისტრაციულ ორგანოს შორის კიდევ 14 დაწესებულება აღმოჩნდა ისეთი, რომლებმაც სრულად უგულებელყვეს კანონით მათზე დაკისრებული ვალდებულება და უპასუხოდ დატოვეს IDFI-ის ყველა მოთხოვნა საჯარო ინფორმაციის გაცემასთან დაკავშირებით.

კერძოდ, IDFI-ის მიერ გაგზავნილი საჯარო ინფორმაციის ყველა მოთხოვნა უპასუხოდ დატოვეს შემდეგმა საჯარო დაწესებულებებმა:

  • შემოსავლების სამსახური;
  • ასპინძის გამგეობა;
  • ბოლნისის გამგეობა;
  • საგარეჯოს გამგეობა;
  • ყაზბეგის გამგეობა;
  • ყვარლის გამგეობა;
  • შუახევის გამგეობა;
  • წალკის გამგეობა;
  • ხონის გამგეობა;
  • ბოლნისის საკრებულო.

2010-2016 წლებში განხორციელებული მონიტორინგის ფარგლებში, IDFI-მ საჯარო დაწესებულებებში სულ 37 582 საჯარო მოთხოვნის შესახებ განცხადება გაგზავნა, საიდანაც მიღებულია პასუხი 30 729 მოთხოვნაზე.

2016 წელს IDFI-მ 294 საჯარო დაწესებულებისთვის გაგზავნილ 7,430 მოთხოვნაზე სრულყოფილი პასუხი მიიღო 4, 458 განცხადებაზე, არასრულყოფილი პასუხი - 404 მოთხოვნაზე, უარი - 26 შემთხვევაში, უპასუხოდ დარჩა 1139 მოთხოვნა.

2016 წელს IDFI-ის სიგელი გადაეცემა ყველა იმ უწყებას, რომელმაც საჯარო ინფორმაციის ხელმისაწვდომობის 100%-იანი მაჩვენებელი აჩვენა.

სულ დაჯილდოვდება 55 საჯარო დაწესებულება, მათ შორის:

  • საქართველოს პარლამენტის აპარატი;
  • საქართველოს გარემოსა და ბუნებრივი რესურსების დაცვის სამინისტრო;
  • საქართველოს სასჯელაღსრულებისა და პრობაციის სამინისტრო;
  • საქართველოს ოკუპირებული ტერიტორიებიდან იძულებით გადაადგილებულ პირთა
    განსახლებისა და ლტოლვილთა სამინისტრო;
  • საქართველოს რეგიონული განვითარების და ინფრასტრუქტურის სამინისტრო;
  • პერსონალურ მონაცემთა დაცვის ინსპექტორის აპარატი;
  • საქართველოს სპორტისა და ახალგაზრდობის საქმეთა სამინისტრო.