ჭიათურის დრამატული თეატრი გაფიცულ მაღაროელებს სოლიდარობასა და სრულ მხარდაჭერას უცხადებს. როგორც თეატრის სამხატვრო ხელმძღვანელმა, მამუკა ცერცვაძემ On.ge-ს უთხრა, დასის წევრები გაფიცულებთან მივიდნენ და საკუთარი პოზიცია დააფიქსირეს.

გარდა ამისა, მსახიობების ნაწილი ამბობს, რომ სანამ მაღაროელების პოზიცია არ დაკმაყოფილდება სპექტაკლებს არ ითამაშებენ. მამუკა ცერცვაძის თქმით, ეს მსახიობების გადაწყვეტილებაა და თეატრი ჩვეულ რეჟიმში იმუშავებს. როგორც ცერცვაძე ამბობს, თუ სიტუაცია გამწვავდება და მოლაპარაკებები არ შედგება, მაშინ თეატრი გადაწყვეტს რა ფორმით დაუდგეს მხარში მაღაროელებს.

ჭიათურაში მაღაროელები მე-11 დღეა შიმშილობენ. ისინი ხელფასების გაზრდასა და სამუშაო პირობების გაუმჯობესებას ითხოვენ. აქციას უკვე შეუერთდნენ მოსწავლეები და მაღაზიების თანამშრომლები.

ჯორჯიან მანგანეზის წარმომადგენლებისა და გაფიცული მაღაროელების შეხვედრა გუშინ, 26 მაისს უშედეგოდ დასრულდა. კომპანიამ გაფიცულებს პირველ ეტაპზე 15-პროცენტიანი და შემდეგ 10-პროცენტით ხელფასების ზრდა შესთავაზა, თუმცა უარი მიიღო. მაღაროელები პირველ ეტაპზე ხელფასის 30-პროცენტიან ზრდას, შემდეგ კი 20-პროცენტიანს ითხოვენ.