თბილისის სახელმწიფო უნივერსიტეტში რექტორად გიორგი შარვაშიძის არჩევის შემდეგ აუდიტორია 115-ის წარმომადგენლები აცხადებენ, რომ კვლავ ჩნდება კითხვები უნივერსიტეტის ავტონომიასთან დაკავშირებით.

მოძრაობის ერთ-ერთი წარმომადგენელი მარიამ ბაღდავაძე აცხადებს, რომ არ იცის კანდიდატებიდან ვის დაასახელებდა კარგ რექტორად, თუმცა შარვაშიძე აუდიტორია 115-სთვის მიუღებელი კანდიდატი იყო:

"საეჭვოა საერთოდ ის გადადგამს, თუ არა ქმედით ნაბიჯებს, რომელსაც ამტკიცებს. ის ამას მარტშიც ამტკიცებდა, როდესაც მეტი ბერკეტი ჰქონდა და მინისტრის მოადგილე იყო".

როგორც აუდიტორიაში აცხადებენ, პროცესებს დააკვირდებიან. მთავარი ფუნდამენტური პრინციპისთვის კი, ნებისმიერი რექტორის მმართველობის პერიოდში იბრძოლებენ ისეთი ზომების გამოყენებით, როგორსაც აქამდე იყენებდნენ:

"შარვაშიძეც დაინახავს, რომ უნივერსიტეტი მკვდარი არ არის, არსებობენ სტუდენტები, რომლებიც დაიცავენ საუნივერსიტეტო სივრცის ღირსებას და მოითხოვენ მაღალი ხარისხის განათლებას".

უნივერსიტეტის რექტორობისთვის სულ სამი კანდიდატი იბრძოდა. მათთვის მიცემული ხმები კი ასე გადანაწილდა:

  • განათლების მინისტრის ყოფილი მოადგილე გია შარვაშიძე - 21 ხმა;
  • უნივერსიტეტის პროფესორი ცირა ბარამიძე - 5 ხმა;
  • პროფესორი გიორგი ბარამიძე - 6 ხმა;
  • 4 ხმა - ბათილი;

უნივერსიტეტის აკადემიური საბჭოს წევრების კერჭისყრის პროცედურა 14:00 საათზე დაიწყო და ერთ საათს გაგრძელდა.

კენჭისყრას წინ უძღოდა კანდიდატების გასაუბრება აკადემიური საბჭოს წევრებთან.

გიორგი შარვაშიძე განათლების მინისტრის მოადგილე იყო 2013 წლიდან დღემდე. ასევე, იგი იყო ღია საზოგადოების ინსტიტუტის, აკადემიური მხარდაჭერის პროგრამის დირექტორი 2004-2013 წლებში და განათლების პოლიტიკის, დაგეგმვისა და მართვის საერთაშორისო ინსტიტუტის პრეზიდენტი.

შარვაშიძე ასევე განათლების მინისტრის მოადგილის პოსტს იკავებდა 1994-1996 წლებში და განათლების მინისტრის პირველი მოადგილე იყო 1996-2000 წლებში.