კოალიცია დამოუკიდებელი და გამჭვირვალე მართლმსაჯულებისათვის თბილისის საქალაქო სასამართლოს თავჯდომარის პოსტიდან მამუკა ახვლედიანის გადაყენებას კანონის უხეშ დარღვევად აფასებს. არასამთავრობოები მიიჩნევენ, რომ გადაწყვეტილება ყოველგვარ სამართლებრივ ლოგიკასაა მოკლებული და საბჭოს მხრიდან კანონის თვითნებურ და არასწორ გამოყენებაზე მიუთითებს.

კოალიციის განმარტებით, ახვლედიანის დაკავებული თანამდებობიდან გათავისუფლება არა მხოლოდ კონკრეტული პირის უფლებებს არღვევს, არამედ იმაზეც მიუთითებს, რომ კრიტიკული აზრის გამოხატვას საბჭოს მხრიდან მსგავსი მექანიზმების გამოყენება მოსდევს. არასმთავრობოები განმარტავენ, რომ თავჯდომარე 5 წლის ვადით აირჩევა და მის გათავისუფლებას კონკრეტული საფუძველი უნდა გააჩნდეს. მათი თქმით, მხოლოდ შესაბამისი გადაცდომის შემდგომ შეიძლება საბჭომ აღნიშნულ პირს თანამდებობა დაატოვებინოს.

განცხადებაში ასევე საუბარია იმაზე, რომ საზოგადოებაში უკვე წლებია ტრიალებს აზრი, საქმეთა განაწილების წესის ხარვეზებზე და იმაზეც, რომ მათ აღმოსაფხვრელად საბჭო არანაირ ნაბიჯებს არ დგამს. კოალიცია განმარტავს, რომ ახვლედიანის მხრიდან სწორედ ხარვეზების საკითხის წინ წამოწევამ გამოიწვია მისი თანამდებობიდან გათავისუფლება.

განცხადებაში ასევე აღნიშნულია, რომ ახვლედიანის გათავისუფლება შერჩევითი მიდგომის ნათელი მაგალითია. კოალიცია მიიჩნევს, რომ საბჭო ცდილობს "არასასურველი" მოსამართლეების წინააღმდეგ ბრძოლას და მის გუშინდელ გადაწყვეტილებას საშიშ პრეცედენტს უწოდებს.

თბილისის საქალაქო სასამართლოს თავჯდომარე მამუკა ახვლედიანი თანამდებობიდან მას შემდეგ გაათავისუფლეს, რაც მან მოსამართლეთა გამოცდების შედეგების გაყალბებაზე საუბარი ღიად დაიწყო.