არჩევნების დაწყებიდან 7 საათი გავიდა და მარნეულის #5 უბანზე ახლა არკვევენ როგორ შემოწმდეს მარკირება.

ამ უბანზე დაახლოებით სამ საათზე მისული ამომრჩევლის შემოწმებას ხმაური მოჰყვა. ერთ-ერთი დამკვირვებელი მოითხოვდა მისთვის ორივე თითი შეემოწმებინათ, რადგან საარჩევნო კოდექსი ასე ითხოვდა. უცნობია, რომელ პარტიას ან ორგანიზაციას წარმოადგენდა ის, რადგან ტერიტორია განმარტებების გარეშე დატოვა.

ადგილზე მოვიდა ცენტრალური საარჩევნო კომისიის წარმომადგენელი, რომელმაც განუმარტა კომისიის წევრებს, როგორ კეთდებოდა მარკირება.

"ამოწმებთ ცერა თითს. თუ ცერა თითი არ აქვს, მაშინ საჩვენებელს, თუ საჩვენებელი არ აქვს, მაშინ შემდგომ თითს. თუ შემდგომი თითებიც არ არსებობს, ასეთ შემთხვევაში ვითხოვთ მეორე, მარცხენა ხელის საჩვენებლი თითის შემოწმებას", - განაცხადა მან.

ამ შემთხვევიდან რამდენიმე წუთში უბანზე მივიდა მარკირებული პირი, რომელიც ჯერ შეუშვეს ხმის მისაცემად, შემდეგ კი ხელახლა შეამოწმეს და გააბრუნეს.

ამავე უბანზე, დამკვირვებლებმა და საარჩევნო კომისიის წევრებმა არ იცოდნენ, იყო თუ არა კანონით აკრძალული ამომრჩევლისთვის კაბინაში ფოტოს გადაღება. ცესკოს წარმომადგენელმა განუმარტა მათ, რომ გადაღება ეკრძალება გარეშე პირს, მაგრამ ამომრჩეველს არა.

კომისიის წევრების ნაწილმა მოითხოვა უბანზე გააკრან წარწერები ან მინიშნებები, რომელიც გააგებინებს ამომრჩეველს, რომ ფოტოგადაღება აკრძალულია.

"ერთმანეთს ვაყენებთ ცუდ მდგომარეობაში და რატო ვიქცევით ისე, რომ ვაწყენინოთ? თუკი კანონში წერია ეგ, გაეკრას ერთი ბროშურა იქ", - განაცხადა კომისიის ერთ-ერთმა წევრმა.

მოგვიანებით ამავე უბანზე იკამათეს იმის შესახებ როგორ უნდა გადაეღო უბანი ცესკოს კამერას. ერთი წევრი ამტკიცებდა, რომ კამერა მხოლოდ ურნას უნდა უყურებდეს და აპროტესტებდა იმას, რომ კადრში მაგიდაც ჩანს. მეორე წევრი ამბობდა, რომ კადრში ურნა და კაბინები უნდა ჩანდეს, მესამე კი ამბობდა, რომ ვიდეოს ვერ მიაახლოვებდა და მხოლოდ ამ კადრის გადაღება შეეძლო.

ფოტო: On.ge

ამ უბანზე პრობლემა გახდა ჟურნალისტის მუშაობის საკითხი. ცესკოს წარმომადგენელმა On.ge-ს ჟურნალისტს განუმარტა, რომ 10 წუთის შემდეგ ვიდეოგადაღების უფლება მხოლოდ ერთი ადგილიდან ჰქონდა. მას შემდეგ, რაც მან უბანი დატოვა ერთ-ერთმა დამკვირვებელმა განაცხადა, რომ ჟურნალისტი წესს არღვევდა და მოითხოვა გადაღება შეეწყვიტა. რამდენიმე წუთიანი კამათის და საარჩევნო კოდექსის მოშველიების შემდეგ ის დარწმუნდა, რომ ჟურნალისტს გადაღების უფლება აქვს.

ამ წუთებში კომისიის მდივანმა მარეხი ხმალაძემ განაცხადა, რომ მას დაუკავშირდა ცესკოს წევრი, რომელმაც აზრი შეიცვალა და უთხრა, რომ ამომრჩეველი გააფრხილონ კაბინაში არ გადაიღონ.