ზუგდიდის რაიონულმა სასამართლომ დადიანების სასახლეში მომხდარი ინციდენტის საქმეზე სანდრა რულოვსის თანმხლებ პირს და ოდიშის ჟურნალისტ ლევან თორიას აღკვეთი ღონისძიების სახით 3 000-ლარიანი გირაო შეუფარდა.

ის სასამართლოს გადაწყვეტილებას არ დაეთანხმა. ლევან თორიას ბრალი ძალადობის ფაქტზე, სისხლის სამართლის კოდექსის 126-ე მუხლის პირველი ნაწილით აქვს წარდგენილი.

ამავე საქმეზე მოქალაქე მამუკა ცირდავას რაიონულმა სასამართლომ 3 ათასი ლარი გირაო შეუფარდა, შეტანის ვადად კი 15 დღე განისაზღვრა. ბრალდების მხარე ბრალდებულისთვის სამი ათას ლარიან გირაოს ითხოვდა. ბრალდებულს უფლებადამცველი არ ჰყავდა და პროცესზე განაცხადა, რომ თავად დაიცავდა საკუთარ ინტერესებს. ის დაეთანხმა ბრალდების მხარის მოთხოვნას.

ცირდავას ბრალი ძალადობის ფაქტზე, სისხლის სამართლის კოდექსის 126-ე მუხლის პირველი ნაწილით 17 მაისს წარედგინა.

საქმე ეხება 14 მაისს დადიანების მუზეუმის ეზოში მომხდარ ინციდენტს, სადაც ტელეკომპანია ოდიშის ინფორმაციით, ქართული ოცნების კოორდინატორები გადაცემის ჩაწერის დროს ჟურნალისტებს, გაერთიანებული ოპოზიციის მერობის კანდიდატს და მის თანმხლებ პირებს ფიზიკურად დაუპირისპირდნენ.

შემთხვევა დადიანების სასახლის ეზოში დღეს 14 მაისს მოხდა, როდესაც ტელეკომპანია ოდიშის გადაცემის ჩაწერა მიმდინარეობდა. ტელეკომპანიის მიერ გავრცელებულ კადრებში ჩანს, რომ აგრესიულად განწყობილი პირები ფიზიკურ და სიტყვიერ შეურაცხყოფას აყენებდნენ სანდრა რულოვსსა და ჟურნალისტებს.