პლატფორმაა არა ფობიას! ჰომოფობიასთან, ტრანსფობიასა და ბიფობიასთან ბრძოლის საერთაშორისო დღესთან დაკავშირებით ხელისუფლებასა და საზოგადოებას იმ გამოწვევებს და პრობლემებს ახსენებს, რაც ამ მიმართულებით დგას. არასამთავრობები ამბობენ, არსებული რისკები ლგბტ თემის წარმომადგენლებს ხელს უშლით ისარგებლონ შეკრებისა და მანიფესტაციის თავისუფლების უფლებით.

"საზოგადოების ჯგუფებს შორის დაპირისპირება გაამძაფრა საქართველოს საპატრიარქოს მიერ 17 მაისის ოჯახის სიწმინდის დღედ გამოცხადებამ, რითაც გაძლიერდა ჰომოფობიური განწყობა, რომ თითქოს LGBTQI თემის წარმომადგენელთა მიერ IDAHOT-ის აღნიშვნა ქართული საზოგადოების კულტურული და სახელმწიფოებრივი თვითმყოფადობის წინააღმდეგ მიმართულ ქმედებას წარმოადგენს", — წერია განცხადებაში.

არასამთავრობოების ამბობენ, 2013 წელს გამოვლენილი აგრესიის გამო ადეკვატურად არავინ დასჯილა, უახლოეს წარსულში განვითარებული მოვლენები კი სამართალდამცავთა გულგრილობაზე მიუთითებს "სახელმწიფო ორგანოების უმოქმედობამ და არასათანადო რეაგირებამ საზოგადოებაში ჰომოფობიური, არატოლერანტული განწყობები კიდევ უფრო წაახალისა". განცხადებაში წერია, რომ პოლიტიკოსები დღემდე იყენებენ სიძულვილის ენას და სექსუალური უმცირესობები ხდებიან პოპულიზმის იარაღი. ამის მაგალითად განცხადებაში მოყვანილია 2018 წელს კონსტიტუციური ცვლილება, რომლის მიხედვითაც მმართველმა პარტიამ "ქორწინების ცნება" განმარტა, როგორც ქალისა და კაცის კავშირი ოჯახის შექმნის მიზნით.

არა ფობიას! მოუწოდებს ხელისუფლებას შეიმუშავოს ერთიანი ხედვა ჰომოფობიის სისტემური პრობლემის გადასაჭრელად, უზრუნველყოს ლგბტ პირთა თანასწორუფლებიანობის დაცვა, საჯარო სივრცეებით მშვიდობიანი სარგებლობა, ძალადობის პრევენცია და სათანადო რეაგირება ჰომო-ტრანსფობიურ დანაშაულებზე, ხელი შეუწყოს განათლების, ჯანდაცვისა და დასაქმების სფეროში ლგბტ პირთა მიმართ დისკრიმინაციის აკრძალვას.

განცხადებას ხელს აწერენ:

  • საქართველოს დემოკრატიული ინიციატივა;
  • ადამიანის უფლებათა ცენტრი;
  • დემოკრატიისა და უსაფრთხო განვითარების ინსტიტუტი;
  • მედიის განვითარების ფონდი;
  • საფარი;
  • საქართველოს რეფორმების ასოციაცია;
  • ტოლერანტობისა და მრავალფეროვნების ინსტიტუტი;
  • სამართლიანი არჩევნებისა და დემოკრატიის საერთაშორისო საზოგადოება;
  • საქართველოს გაეროს ასოციაცია;
  • საერთაშორისო გამჭვირვალობა - საქართველო.