ჯერ კიდევ 2018 წლის თებერვალში, ოსკარის მფლობელმა ჯენიფერ ლოურენსმა თქვა, რომ ის მსახიობობისთვის დროებით თავის დანებებას აპირებდა. BBC-ის ინფორმაციით, მსახიობი აპირებდა კინოდან აქტივიზმში გადაენაცვლა.

მიუხედავად აღებული პაუზისა, ჯენიფერმა "მოასწრო" და მონაწილეობა მიიღო რამდენიმე ფილმში, რომელთაგანაც ერთ-ერთი 2018 წელს გამოვიდა, ერთიც კი წელს გამოვა. შესაბამისად, მართალია ის კინოსგან ისვენებდა, თუმცა, ეკრანზე მაინც ჩანდა.

მსახიობმა, ხანგრძლივი დუმილი დაარღვია და კინოსამყაროში დასაბრუნებლად ახალი პროექტიც დააანონსა. ოსკაროსანი ლოურენსი მონაწილეობას მიიღებს რეჟისორ ლილა ნიუგბაუერის ახალ ფილმში. ეს რეჟისორის პირველი შეხება იქნება კინოსამყაროსთან, აქამდე ის თეატრის რეჟისორი იყო.

მთავარი როლის გარდა, ჯენიფერი ფილმის პროდიუსერიც იქნება. გადაღებები, სავარაუდოდ, ივნისში, ნიუ-ორლეანში დაიწყება.

ამ ეტაპზე უცნობია, თუ რაზე იქნება ფილმი. თუმცა, თუ ჯენიფერის კარიერას გადავხედავთ, გასაკვირი არ იქნება, თუ ის ამ როლით ოსკარის კიდევ ერთ ნომინაციას მიიღებს.

ჯენიფერ ლოურენსი, დატვირთული გრაფიკისა და თავბრუდამხვევი კარიერის პარალელურად ყოველთვის ახერხებდა დრო სხვადასხვა, მნიშვნელოვანი აქტივობებისთვისაც გამოენახა. ის აქტიურად მუშაობს ქალთა მიმართ ძალადობის აღმოსაფხვრელად, ცდილობს დაძლიოს სექსიზმი კინოინდუსტრიაში და რამდენიმე საქველმოქმედო ორგანიზაციის დონორიც არის.