ლეგენდარული ფრანგი რეჟისორი ჟან-ლუკ გოდარი რამდენიმე დღის წინ 2019 წლის FIAF Award-ს დაესწრო.

გამომდინარე იქიდან, რომ ის საჯაროდ ხშირად არ ჩნდება, მისი სტუმრობა იქ დამსწრე საზოგადოებისთვის მოულოდნელი იყო, სწორედ ამიტომ ფრანგული სინემატიკის დირექტორმა ფრედი ბიუაშმა რეჟისორის წარდგენამდე ამაღელვებელი სიტყვა წარმოსთქვა.

გოდარმა სცენაზე გამოსვლის შემდეგ მის ბოლო ფილმზე The Image Book დაიწყო საუბარი, რომელიც გასულ წელს კანის კინოფესტივალზე სპეციალური პრიზით აღინიშნა.

"როდესაც ამ ფილმს ვქმნიდი, ვეცადე გამომეყენებინა ის ენა რომელიც მხატვრობასაც აქვს და მუსიკასაც. კინოსაც აქვს ასეთი ენა, რომელიც ჯერ კიდევ მუნჯი კინოდან მოდის და რაც ხმოვანი კინოს გამოჩენის შემდეგ დაიკარგა", — თქვა რეჟისორმა.

ჟან-ლუკ გოდარმა აღნიშნა, რომ ის გრძნობს, თუ როგორ ქრება კინო ნელ-ნელა და ამაში ერთ-ერთ მთავარ ბრალდებულად სტრიმინგ-სერვისებს ასახელებს.

"ჩვენ ნელ-ნელა ვკარგავთ კინოს. მაგალითად ამ ახალი, ნეტფლიქსის და ყველა სხვა დანარჩენის წყალობით. ხალხი მხოლოდ მათი დახმარებით უყურებს კინოს და ისინი აღარც დადიან და არც აწი წავლენ კინოში", — თქვა რეჟისორმა.

მიუხედავად იმისა, რომ გოდარი ნეტფლიქსს აკრიტიკებს, უნდა ითქვას, რომ მისი ბოლო ფილმის ჩვენების უფლების შეძენას, სავარაუდოდ, სწორედ ეს სტრიმინგ-სერვისი აპირებს.