იაპონელი ილუსტრატორი, რომელიც სოციალურ მედიაში Ariduka55-ის ფსევდონიმითაა ცნობილი, აქვეყნებს რამდენიმე ილუსტრაციას, რომელშიც გიგანტური ცხოველები ადამიანებთან ერთად ცხოვრობენ.

ილუსტრაციების შთაგონება სტუდიო ჯიბლია, უფრო კონკრეტულად კი ანიმეები: პრინცესა მონონოკე და ტოტორო.

კატები, ძაღლები, ბუები, კურდღლები — არსებები, რომლებიც ჩვეულებრივ სამყაროში გვყავს, მის ილუსტრაციებში ზომით სამსართულიან შენობას უტოლდებიან.

წარმოგიდგენთ რამდენიმე ილუსტრაციას, საიდანაც თითოეული თავის ისტორიას გვიყვება:

1. მგლის ისტორია

იაპონურ მითოლოგიაში, ფერმერებს მგლების საპატივსაცემოდ სალოცავი ჰქონდათ, სადაც მათთვის საკვებს ტოვებდნენ. ლეგენდის თანახმად, მგელი მათ ველური ტახისა და ირმებისგან იცავდა. მას სოფელში სიუხვე მოჰქონდა, ხოლო წყვილისთვის, რომელსაც ბავშვის ყოლა სურდა — ნაყოფიერება. აინუს ტომს სჯეროდა, რომ ისინი მგლისა და ქალღმერთის ნაჯვარი იყვნენ.

2. უზრდელი ფისო

იაპონელები ყოველდღიურ მისასალმებელ სიტყვას, tadaima-ს იყენებენ, რომელიც "სახლში მოვედი"-ს შემოკლებული ფორმაა. ხშირ შემთხვევაში, ამაზე "okaeri"-ს პასუხობენ, იგივე "კეთილი იყოს შენი მობრძანება". მაგრამ, როგორც ჩანს, ილუსტრაციის ფისოს ზრდილობიანად მოქცევა არ სცოდნია.

3. შავი კატა და ტოტორო

გიგანტურმა შავმა კატამ არა მხოლოდ ბუნებაში იპოვა კომფორტი, მან პატარა, ლურჯი მეგობარიც შეიძინა. არსება თავისი დიდი თვალებით ღიბლის სტუდიოს ერთ-ერთ ანიმეს, ტოტოროს, ძალიან ჰგავს.

4. კიცუნეს ტრანსფორმაცია

"Kitsune" იაპონური სიტყვაა და მელას ნიშნავს. ის იაპონურ ტრადიციასა და ფოლკლორში დღემდე ერთ-ერთ პატივსაცემ, დაფასებულ ცხოველად რჩება. ხშირად, სწორედ ასეთ ისტორიებში იგი ინტელექტუალური არსებაა და მაგიურ ძალას ფლობს. იოკაის ფოლკლორის მიხედვით, კიცუნეს ადამიანად ტრანსფორმაცია შეუძლია. სხვა ფოლკლორები ამ უნარს ერთგვარ დამაბნეველ ხრიკს უწოდებენ მტრის მიმართ. იაპონურ მითოლოგიაში მელია ერთ-ერთი ყველაზე მეგობრული, მოსიყვარულე და ერთგული არსებაა.

5. წინამძღოლი ბუ

იაპონელებისთვის არაა უჩვეულო ბუს თილისმის ტარება. როგორც კატები, ისე ბუები მათთვის იღბლის მომტანი არსებები არიან და ადამიანებს ტანჯვისგან იცავენ. ქვეყნის სხვადასხვა ნაწილში ბუებს სხვადასხვა ფუნქცია აქვთ დაკისრებული. მაგალითად, ისინი ზოგიერთ ფოლკლორში წინამძღოლ ჩიტებად გვევლინებიან, ხოლო სხვა ტრადიციების მიხედვით, მათ ამინდის წინასწარმეტყველება შეუძლიათ.

6. კატა, როგორც იღბალის სიმბოლო

იმის გარდა, რომ კატას დღემდე თაყვანს სცემენ, იაპონურ კულტურაში მათი დიდი, ფუმფულა ბეწვი იღბალის ნიშანია. ცნობილი იაპონური კატის, maneki-neko-ს ფიგურა, მათი აზრით, ოჯახებს იცავს.

7. "ფიჩხის ძაღლი"

იაპონიაში ყველაზე სათუთად ძაღლის ერთ-ერთ ჯიშს, Shiba Inu-ს უვლიან. ეს ქართულად, პირდაპირი მნიშვნელობით ფიჩხის ძაღლს ნიშნავს. ძაღლებს ტრადიციულად პატარა ცხოველებზე სანადიროდ წვრთნიდნენ, დღეს კი ისინი პოპ-კულტურაში საკმაოდ პოპულარული არსებები არიან.

8. ილუზიის ოსტატი ტანუკები

იაპონური ფოლკლორის მიხედვით, ტანუკები, ენოტისმაგვარი არსებები, ილუზიის ოსტატები არიან. მათ შეუძლიათ გარდაისახონ ისეთ რამედ, როგორადაც მოუნდებათ — თეთრი ღვინის ბოთლიდან დაწყებული მოხუცი ქალით დამთავრებული. სწორედ ასეთი შენიღბვის დროს, ისინი ხალხს იტყუებდნენ თავიანთ თამაშებში, თუმცა ბოროტები არ იყვნენ, უბრალოდ ერთობოდნენ. ასეთი თამაშები ხშირად მათივე უხერხულობითა და სირცხვილით მთავრდებოდა.

9. გლიცინიების ბაღი

იაპონია სავსეა საოცარი პეიზაჟებით, თუმცა ყველაზე ჯადოსნურ გარემოს მათი საკურები ქმნიან. ერთ-ერთი ასეთი ადგილი სწორედ Kawachi Fuji Gardens-ია, რომელიც უამრავ გლიცინიას მფარველობს.

10. პეპელა

პეპელა იაპონელებისთვის მკვდრებისა და ცოცხლების სულია, ვინაიდან, მათი მითოლოგიის თანახმად, მკვდარი სულები პეპლის ფორმას იღებენ სხვა სამყაროში მოგზაურობის დროს.