გიორგი კვირიკაშვილის განცხადებით, ამერიკის შეერთებულ შტატებში საქართველოს ელჩის კანდიდატურა შერჩეულია, პოსტს საპარლამენტო არჩევნების შემდეგ ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე დაიკავებს.

პრემიერმინისტრი მიიჩნევს, რომ დავით ბაქრაძის ნატოს წევრ ქვეყნებში ელჩად და ევროატლანტიკური ნტეგრაციის მიმართულებით მუშაობის დროს მიღებული გამოცდილება და მისი პიროვნული თვისებები მნიშვნელოვანია ხალხთა შორის ურთიერთობების გამყარების კუთხით:

"ვფიქრობთ, ბატონ დავითს გააჩნია ყველა ის თვისება, რაც განაპირობებს მის მომავალ წარმატებას ამ მეტად მნიშვნელოვან პოსტზე. მინდა ვისარგებლო შემთხვევით და მადლობა გადავუხადო არჩილ გეგეშიძეს, რომელმაც დიდი სამუშაო გასწია. მისი ელჩობის პერიოდში მნიშვნელოვნად განვითარდა საქართველოს პარტნიორობა აშშ-თან, ჩვენი სტრატეგიული თანამშრომლობის ქარტიის ყველა მიმართულებით. მინდა მასაც ვუსურვო წარმატება მის მომავალ საქმიანობაში".

პრემიერმინისტრის განმარტებით, ელჩის კანდიდატურის შესახებ გადაწყვეტილება უკვე მიღებულია, რასაც წინ უძღოდა კონსულტაციები საქართველოს პრეზიდენტთან.