პარლამენტარის, ემზარ კვიციანის ორგანიზაცია ქართული ემიგრაციის დემოგრაფიული და ეკონომიკური ცენტრი საქმიანობაში საპატრიარქოს ჩართვას გეგმავს. ამის შესახებ ცენტრის დირექტორმა, ნუკი შალამბერიძემ განაცხადა.

"ვაპირებთ საპატრიარქოსთან კომუნიკაციას. რამდენიმე სატელოფონო საუბარი გვქონდა რამდენიმე მოძღვართან. ისინიც აუცილებლად ჩაერთვებიან", — ამბობს დირექტორი.

ორგზანიზაციის დირექტორი აზუსტებს, რომ კვიციანის მიერ გაჟღერებული ინფორმაცია, რომ ეს ცენტრი შეყვარებულების აღმრიცხავია, სიმართლე არ არის. ის განმარტავს, რომ ცენტრი ახალდაქორწინებულ წყვილებს დაეხმარება, რომლებიც მთაში გადავლენ საცხოვრებლად.

"წყვილებმა, რომლებმაც ახლახანს შექმნეს ოჯახი და აქვთ მთაში დასახლების სურვილი, უნდა მიმართონ ცენტრს და ის დაეხმარება ფინანსურად... ქორწინება იუსტიციის სახლში უნდა იყოს რეგისტრირებული. ეს არ ეხება შეყვარებულებს", — აღნიშნავს ორგანიზაციის დირექტორი.

მისივე თქმით, წყვილებს მთაში სახლს "ათხოვებენ" და თუკი დარწმუნდება ცენტრი, რომ მათ ნამდვილად აქვთ მთაში ცხოვრების სურვილი, ეს სახლი მათ საკუთრებაში გადავა.

2019 წლის 15 თებერვალს პატრიოტთა ალიანსის წევრმა, ემზარ კვიციანმა განაცხადა, რომ დაფუძნდა არასამთავრობო ორგანიზაცია, რომელიც ახალგაზრდებს ოჯახების შექმნაში დაეხმარება. საჯარო რეესტრმა ორგანიზაცია 18 თებერვალს დაარეგისტრირა.

ემზარ კვიციანის განმარტავდა, რომ ეს ცენტრი დაეხმარება ისეთ წყვილებს, რომლებსაც ოჯახის შესაქმნელად ფინანსური რესურსი არ აქვთ. მისი თქმით, აგენტები ივლიან, რომლებიც გაიგებენ, სად არიან ასეთი წყვილები, მათ აღრიცხვაზე აიყვანენ და შემდეგ გაუწევენ ფინანსურ დახმარებას. რაც შეეხება ბიუჯეტს, მისივე თქმით, ფულს ემიგრანტები ჩარიცხავენ.