ქართულმა ოცნებამ 8 სექტემბერს პარტიის საარჩევნო პროგრამის პრეზენტაცია გამართა, რომელსაც პრემიერმინისტრი გიორგი კვირიკაშვილი უძღვებოდა. საარჩევნო პროგრამის ერთ–ერთი მნიშვნელოვანი ნაწილია ეკონომიკური განვითარების პროგრამა, სადაც თავის მხრივ, საუბარია კონკრეტული ეკონომიკური დანაშაულებების დეკრიმინალიზებასა და გარკვეული პასუხისმგებლობების შემსუბუქებაზე.

ოცნების საარჩევნო პროგრამის მიხედვით, მოხდება სამეწარმეო საქმიანობის განხორციელებასთან დაკავშირებული ეკონომიკური დანაშაულის დეკრიმინალიზაცია:

  • გაუქმდება სისხლის სამართლის პასუხისმგებლობა ქმედებებისთვის, რომლებიც თავისი შინაარსით საგადასახადო სამართალდარღვევას წარმოადგენს, როგორიცაა სასაქონლო ზედნადების არასრულად ან/და არასწორად შევსება (საქონლის რაოდენობის ან/და ფასის შემცირება);
  • 10 ათას ლარზე მეტი ღირებულების საქონლის სასაქონლო ზედნადების გარეშე ტრანსპორტირება, სავალდებულო მარკირებას დაქვემდებარებული არააქციზური საქონლის მარკირების გარეშე რეალიზაცია, ბუღალტრული აღრიცხვის წესის დარღვევა;
  • 100 ათას ლარამდე გაიზრდება გადასახადებისგან თავის არიდებისათვის სისხლის სამართლის პასუხისმგებლობის დაკისრების ზღვარი, რაც 2017 წლიდან, ხანდაზმულობის ვადის 3 წლამდე შემცირების ფონზე, ოცნების აზრით, მნიშვნელოვანი ეფექტის მომტანი იქნება ბიზნესისთვის;
  • გამოცხადდება სისხლის სამართლის კოდექსის 210-ე (ყალბი საგადასახადო დოკუმენტის დამზადება ან გამოყენება) და 218-ე (გადასახადისთვის თავის არიდება) მუხლებით გათვალისწინებული დანაშაულების სრული ამნისტია. შესაბამისად, სისხლისსამართლებრივი პასუხისმგებლობისა და სასჯელისაგან გათავისუფლდებიან პირები, რომლებმაც აღნიშნული დანაშაულები 2013 წლის 1 იანვრამდე ჩაიდინეს;
  • გახდება დაუძლეველი ძალის, მათ შორის სტიქიური უბედურების მოქმედების შედეგად განადგურებული/დაკარგული სასაქონლო- მატერიალური ფასეულობების ჩამოწერა გამარტივებული წესით;
  • განხორციელდება საგადასახადო დავების სისტემის რეფორმა;
  • განხორციელდება სახელმწიფო სერვისების საფასურების ოპტიმიზაცია, რაც გულისხმობს ფასიანი მომსახურებების რაოდენობისა და საფასურების ოდენობების შემცირებას;
  • შემუშავდება კონცეფცია, რომლის თანახმად შესაძლებელი გახდება, შეიქმნას სპეციალიზებული კომერციული კოლეგიები საერთო სასამართლოების სისტემაში;
  • გამარტივდება ბიზნესის ლიკვიდაციის პროცედურები;

ქართული ოცნების დაპირების მიხედვით, გაგრძელდება მეწარმეობის ხელშემწყობი პროგრამები, კონკურენტული ბიზნესგარემოს ხელშეწყობისთვის, მოხდება სახელმწიფოს ეტაპობრივად გამოსვლა ეკონომიკის იმ დარგებიდან, რომლებსაც აქვს დამოუკიდებლად ფუნქციონირებისა და განვითარების პოტენციალი.

მმართველი პარტია ამომრჩეველს ასევე ჰპირდება, რომ 2017 წლიდან ძალაში შევა მოგების გადასახადის ახალი მოდელი, რომლის მიხედვით საწარმოს მიერ მიღებული
მოგება დაიბეგრება მხოლოდ მისი განაწილებისას. შესაბამისად, საწარმო მოგების გადასახადს გადაიხდის იმ შემთხვევაში, თუ მოგებას გაანაწილებს დივიდენდის სახით მის პარტნიორებზე ან არაეკონომიკური მიზნით გასწევს გარკვეულ ხარჯებს.

ქართული ოცნება დარწმუნებულია, რომ ეკონომიკური რეფორმების შედეგად, საქართველოში შემდეგ 4 წელიწადში 200 ათას სამუშაო ადგილს შექმნის.