დღეს, 28 აპრილს, კამპანია ეს შენ გეხებას ირგვლივ გაერთიანებული არასამთავრობო ორგანიზაციები პირადი ცხოვრების ხელშეუხებლობასთან დაკავშირებულ კანონპროექტებზე მსჯელობას, მრგვალი მაგიდის ფორმატში განაგრძობენ. არასამთავრობოები აღნიშნულ ინიციატივას პარლამენტს უახლოეს დღეებში წარუდგენენ.

NGO-ების ძირითად მოთხოვნებში შედის:

1. დამოუკიდებელი სააგენტოს შექმნა, რომელიც ფარულ საგამოძიებო მოქმედებებს დაარეგულირებს და ანგარიშვალდებული მხოლოდ პარლამენტის წინაშე იქნება.
2. დამოუკიდებელი საგამოძიებო ორგანოს შექმნა, რომელიც შეისწავლის სამართალდამცავების მხრიდან ჩადენილ შესაძლო დანაშაულს.
3. სახელმწიფო უსაფრთხოების სამსახურში რეფორმების განხორციელება, ე.წ. ოდეერის ინსტიტუტის გაუქმება და უსაფრთხოების სამსახურზე პარლამენტის კონტროლის გაძლიერება.

როგორც ახალგაზრდა იურისტთა ასოციაციის თავჯდომარე, ანა ნაცვლიშვილი განმარტავს, დამოუკიდებელი საგამოძიებო უწყების შექმნისათვის ორი ძირითადი არგუმენტი არსებობს. მისი თქმით, პირველი არის ის, რომ ძალოვან უწყებებს ბუნებრივად აქვთ ინტერესთა კონფლიქტი საკუთარი წარმომადგენლების მიერ ჩადენილი დანაშაულები გამოიძიონ. მეორე არგუმენტი კი ის პრაქტიკაა, რომელიც წლების განმავლობაში საქართველოში ჩამოყალიბდა:

“სამწუხაროდ, არცერთ გახმაურებულ, საზოგადოებისთვის მაღალი ინტერესის მქონე შემთხვევაში, სადაც ჩნდება ეჭვები, რომ სწორედ სამართალდამცავი ორგანოს წარმომადგენლები იყვნენ ჩართულნი დანაშაულებრივ ქმედებაში, პრაქტიკულად არცერთი შემთხვევა არ მახსენდება, რომ გამოძიება ყოფილიყო დროული, ეფექტური, სრულყოფილი და მიუკერძოებელი”.

მისივე თქმით, გარკვეულმა უწყებებმა დამოუკიდებელი საგამოძიებო კომისიის შექმნაზე მზაობა უკვე გამოხატეს, თუმცა საბოლოო გადაწყვეტილებისთვის ამის შესახებ ჯერ არ მიუღწევიათ.

რესპუბლიკური პარტიის თავჯდომარის ხათუნა სამნიძის თქმით, რესპუბლიკელებმა ალტერნატიული პროექტი ცოტა ხნის წინ წარუდგინეს პარლამენტს, თუმცა უმრავლესობამ ის არ მიიღო. სამნიძის თქმით, ის არ იცნობს ეს შენ გეხებას კანონპროექტებს, თუმცა რესპუბლიკური პარტია არასამთავრობო სექტორთან შეხვედრასა და აღნიშნულ თემაზე მსჯელობას აპირებს.

კამპანია ეს შენ გეხებას წევრები მიიჩნევენ, რომ საკანონმდებლო დონეზე გატარებულმა რეფორმებმა, როგორიცაა პერსონალურ მონაცემთა დაცვის ინსპექტორის ინსტიტუტის შექმნამ და შსს-სა და უსაფრთხოების სამსახურის ერთმანეთისგან გამიჯვნამ, პირადი ცხოვრების ხელშეუხებლობა ვერ უზრუნველყო.

არასამთავრობოების შეხვედრას საპარლამენტო და არასაპარლამენტო პარტიების წარმომადგენლები დაესწრენენ, მათ შორის ქართული ოცნება არ ყოფილა.