თბილისში ბავშვებმა დაკარგულ ძაღლზე ხელნაწერი განცხადება გამოაქვეყნეს და დღეს უფრო საყვარელს ვერაფერს ნახავთ.

ფოტოებს ფეისბუქზე მეგი გაბუნია ავრცელებს.

როგორც განცხადებიდან ირკვევა, დაკარგული იყო შავ-თეთრი ძაღლი, რომელსაც ყავისფერი თვალები აქვს, სახელად კასპერი ჰქვია და საყვარელია. შეიძლება ითქვას, რომ ცხოველის ვიზუალიზაციისთვის ეს მინიშნებები პოვნაში დახმარების მსურველებისთვის სავსებით საკმარისი იქნებოდა, მით უმეტეს, რომ ცნობილი იყო მისი სახელი.

"გთხოვთ წაიკითხეთ ეს განცხადება და მოაწერეთ ხელი, ან მოხებნეთ", - ეწერა განცხადებაში.

ფოტო: მეგი გაბუნია / Facebook

ეს ყველაფერი არაა. ბავშვები მპოვნელს 100 ლარით დასაჩუქრებას ჰპირდებოდნენ, ოღონდ ერთი პირობით:

"ოღონდ მხოლოდ ერთ 100 ლარს მოგცემთ".

ფოტო: მეგი გაბუნია / Facebook

ფოტო: მეგი გაბუნია / Facebook

და თუ წერილის ქვემოთა კუთხეში პატარა ნახატსაც შენიშნავთ, ამ ამბის უემოციოდ დატოვებაც გაგიჭირდებათ.

თუმცა, კარგი ამბავი ისაა, რომ პატარა ბიჭების დიდი მონდომების შემდეგ, ძაღლი დაკარგული აღარაა. როგორც ამბის ავტორმა On.ge-ს უთხრა, საყვარელი, შავ-თეთრი და ყავისფერთვალება კასპერი უკვე იპოვეს და განცხადებებიც ჩამოხსნილია. თუმცა შეიძლება ითქვას, რომ ეს საყვარელი წერილები სამუდამოდ დარჩება ჩვენს მეხსიერებაში, როგორც ნებისმიერი განცხადებისთვის იდეალური შაბლონი, რომელიც სამომავლოდ შეიძლება გამოგვადგეს.