მიუხედავად იმისა, რომ მეგობრები 15 წლის წინ დასრულდა, სერიალის მიმართ ინტერესი არათუ კლებულობს, პირიქით, იზრდება კიდეც.

წლიდან წლამდე შოუს ახალ-ახალი მაყურებელი ემატება და ამაში დიდი წვლილი ნეტფლიქსს მიუძღვის, რომელმაც შოუ თავის სტრიმინგ სერვისზე დაამატა და საბოლოოდ, Friends წლის ერთ-ერთი ყველაზე ყურებადი სერიალი კიდევ ერთხელ გახდა.

აღმოჩნდა, რომ სერიალი ძალიან დიდი პოპულარობით სარგებლობს ახალ თაობაშიც. ამაში ყველაზე უკეთ გარკვეული კი ჯოუის როლის შემსრულებელი, მეთ ლებლანკია, რომელსაც ცოტა უხერხული, თუმცა ძალიან სასაცილო ისტორია გადახდა თავს.

51 წლის მსახიობი, შოუს თინეიჯერ ფანს არც მეტი, არც ნაკლები ჯოუის მამა ეგონა.

"ქუჩაში ვსეირნობდი, როდესაც ერთი ბიჭი მომიახლოვდა, დაახლოებით 13-14 წლის. ჩემი დანახვისას შეიცხადა და მკითხა, ვიყავი თუ არა ჯოუის მამა. იმდენად მოულოდნელი იყო ეს ჩემთვის, რომ გავიქეცი", - იხსენებს მეთი.