უკრაინის პრეზიდენტის, პეტრო პოროშენკოს განაცხადებით, ის და რუსეთის პრეზიდენტი, ვლადიმერ პუტინი სატელეფონო საუბრისას უკრაინელი მფრინავის, ნადეჟდა სავჩენკოს უკრაინაში დაბრუნების სავარაუდო ვადებზე შეთანხმდნენ. ამის შესახებ ინფორმაცია Interfax-მა გუშინ, 24 აპრილს, გაავრცელა.

პოროშენკოს განმარტებით, პირველად ამ დროის განმავლობაში, უკრაინის მხარემ დაინახა პროგრესი მოლაპარაკების პროცესში და რუსულ მხარესთან პრობლემის გადაჭრასთან დაკავშირებულ შეთანხმებას მიაღწია:

"შევთანხმდით სავარაუდო ვადებზე. ამ ვადების შესახებ მე უკვე ვესაუბრე [ნადეჟდას] დედას, დას და ჩემს წარმომადგენლებს, რომლებსაც ამ საკითხის კოორდინაცია ევალებათ".

უკრაინის პრეზიდენტის თქმით, სატელეფონო საუბარში მან სთხოვა სავჩენკოს, შეეწყვიტა შიმშილობა იმისთვის, რომ უკრაინაში ცოცხალი და ჯანმრთელი დაბრუნდეს:

"ამაზე აღარ ვილაპარაკებ. მივმართავ პოლიტიკოსებს, არავითარ შემთხვევაში არ ჩაერიონ ამ პროცესში და არ გააკეთონ რაიმე კომენტარი მასზე. რადგან აქამდე რამდენჯერმე იყო შემთხვევა, როდესაც სწორედ პოლიტიკოსების დაუდევარმა კომენტარებმა დააზარალა და შეაფერხა საკითხის მოგვარება".

პოროშენკოს განცხადებით, მას დიდი იმედი აქვს, რომ რამდენიმე კვირაში ნადეჟდა სავჩენკო უკრაინას დაუბრუნდება, რაც არა მხოლოდ მისთვის, არამედ ბევრი უკრაინელისთვის დიდი ზეიმი იქნება.

რუსულმა მხარემ ნადეჟდა სავჩენკო 2014 წელს წელს დააკავა და ბრალად რუსი ჟურნალისტების იგორ კორნელიუკისა და ანტონ ვოლოსინის მკვლელობა დასდო.