საკონსტიტუციო სასამართლოს მოსამართლე ლალი ფაფიაშვილი პლენუმს გახმაურებული საქმეების თვითგანრიდების შუამდგომლობით მიმართავს. ესენია ე.წ კაბელების საქმე, გიგი უგულავას და რუსთავი 2-ის სარჩელები.

მოსამართლე გადაწყვეტილების მიღების მიზეზად რუსთავი 2-ზე გასულ სიუჟეტს ასახელებს, სადაც აქცენტი მოსამართლის დედა, ტატიანა ახვლედიანის სამართალდარღვევასთან შესაძლო კავშირზე გაკეთდა. საქმე ეხება დოკუმენტების გაყალბებას სანოტარო ბიუროში, რომელშიც ტატიანა ახვლედიანი მუშაობს. რუსთავი 2-ის პოზიციის მიხედვით, ხელისუფლება სწორედ ამ საქმეს იყენებს, რათა ზემოქმედება მოახდინოს მოსამართლე ლალი ფაფიაშვილზე, რომელმაც სასამართლოში უნდა განიხილოს ტელეკომპანიის საქმე.

ფაფიაშვილი აცხადებს, რომ ამ ფაქტების შესახებ პირველად სიუჟეტის მომზადების დროს გაიგო და მისი ოჯახის წევრების შესახებ არასდროს დასმულა სისხლის სამართლის დევნის საკითხი:

"მოსარჩელე მხარის წარმომადგენლები პერმანენტულად და დაჟინებით სვამენ კითხვის ნიშნებს ჩემს მიუკერძოებლობასთან დაკავშირებით, თუმცა ამავდროულად ჯიუტად არ აყენებენ აცილების შუამდგომლობას".

მისივე განცხადებით ეს გადაწყვეტილება მოსარჩელეებმა არ უნდა აღიქვან როგორც პროცესის შეფერხების მცდელობა.

კონკრეტული თარიღი, თუ როდის დაკმაყოფილდება ლალი ფაფიაშვილის შუამდგომლობას ე.წ გახმაურებულ საქმეებზე აცილებასთან დაკავშირებით უცნობია. მის დასაკმაყოფილებლად კი პლენუმის 9 მოსამართლიდან მინიმუმ 5-ის თანხმობაა საჭირო.