ყოველი სიყვარულის ისტორია განსხვავებული და ამაღელვებელია. თუმცა ყველაზე რომანტიკული გრძნობა ამავე დროს ყველაზე რთულიცაა და წინ მრავალი დაბრკოლება ეღობება. ასე იყო ძველ დროში და ასეა დღესაც. დროისა და გარემოს ცვლილებასთან ერთად, სიყვარულის მიმართ ჩვენი დამოკიდებულებაც იცვლება.

21-ე საუკუნის მკითხველისთვის, კლასიკურ რომანთან ერთად, განსაკუთრებით საინტერესოა სწორედ თანამედროვე სიყვარულის ისტორიები, რომელთაც დღეს არსებული პრობლემები სდევს თან.

ბაკურ სულაკაურის გამომცემლობის სერია რომანები სიყვარულზე 2018 წლიდან არსებობს და სასიყვარულო ჟანრის თანამედროვე ნაწარმოებებს მოიცავს. ერთი სახელის ქვეშ გაერთიანებული თითოეული რომანი სიყვარულის უნიკალური ამბავია, რომელიც შეყვარებულების ურთიერთობასა და ისეთ რთულ ადამიანურ თუ სოციალურ პრობლემებს ეხება, როგორებიცაა საზოგადოების მიუღებლობა, სექსუალური ლტოლვა და შეუთავსებლობა, შიში, გაუთქმელი საიდუმლოები და მრავალი სხვა.

შენი სახელი დამიძახე

სერიის პირველი წიგნია ამერიკელი მწერლისა და ესეისტის ანდრე ასიმანის შენი სახელი დამიძახე.

ამ გახმაურებულ რომანში მოქმედება ჩრდილოეთ იტალიის პატარა ქალაქში ვითარდება, სადაც 17 წლის ელიო ამერიკელ სტუდენტს, ოლივერს გაიცნობს. დაუვიწყარ საზაფხულო თავგადასავალს ავტორი ზედმეტი სენტიმენტალიზმის გარეშე მოგვითხრობს.

გახმაურებული რომანის მიხედვით 2017 წელს კინოეკრანებზე გამოვიდა ლუკა გუადანინოს ამავე სახელწოდების ფილმი, რომელმაც ამერიკის კინოაკადემიის ჯილდო საუკეთესო ადაპტირებული სცენარისთვის მიიღო.

მთარგმნელი: გურამ ღონღაძე

ქვიან სანაპიროზე

"ორი ახალგაზრდა, განათლებული და ყოველმხრივ უმანკო – განსაკუთრებით კი ქორწინების ღამეს – იმ დროში ცხოვრობდა, სექსუალურ შეუთავსებლობაზე ხმას რომ ვერ ამოიღებდი" – ასე იწყება თანამედროვე ბრიტანელი კლასიკოსის, იენ მაკიუენის რომანი ქვიან სანაპიროზე, რომელიც სერიას სულ მალე შეემატება.

ამბავი მთავარი პერსონაჟების, ედუარდისა და ფლორენსის ქორწინების პირველ დღეს იწყება. სხვადასხვა გარემოში გაზრდილი გმირების განსხვავებული მოლოდინი და შფოთვა მათ ურთიერთობას მალევე ჩიხში შეიყვანს.

რომანმა გამოცემიდან მალევე მოიპოვა პოპულარობა და მსოფლიოს არაერთ ენაზე ითარგმნა, 2018 წელს კი ეკრანებზე ამავე სახელწოდების ფილმიც გამოვიდა.

მთარგმნელი: გურამ ღონღაძე

ჯეინ ოსტინის მკითხველთა კლუბი

ახლო მომავალში სერიის ფარგლებში იგეგმება მესამე წიგნის გამოცემაც. კარენ ჯოი ფაულერის ჯეინ ოსტინის მკითხველთა კლუბი ექვსი პერსონაჟისთვის ინდივიდუალური გრძნობებისა და განცდების ისტორიაა, რომლის გამაერთიანებელი ხაზი ჯეინ ოსტინის ნაწარმოებებით გატაცებაა.

მიუხედავად იმისა, რომ ნაწარმოები არცთუ დიდი მოცულობისაა, ის არაერთ თემას მოიცავს, იქნება ეს სიყვარული, ქორწინება თუ განქორწინება, შვილები და მშობლები.

2007 წელს ეკრანებზე გამოვიდა ჯეინ ოსტინის მოყვარულთა კლუბის მიხედვით გადაღებული იმავე სახელწოდების რომანტიკული დრამა, რომელიც საკმაოდ დიდი პოპულარობით სარგებლობს.

მთარგმნელი: ეკატერინე მაჩიტიძე

სერია რომანები სიყვარულზე უამრავ ახალ, მნიშვნელოვანი პრობლემური თემებით გაჯერებულ საინტერესო და ამაღელვებელ სასიყვარულო ისტორიას ჰპირდება მკითხველს, რომლისთვისაც სიყვარული მუდმივი ამოუხსნელი მოვლენაა.