TI-ის ინფორმაციით, გამოკითხულ პოლიტიკურ პარტიათა აბსოლუტური უმრავლესობა მიიჩნევს, რომ სახელმწიფოს მიერ დაფინანსებული საყოველთაო ჯანდაცვის პროგრამა არ უნდა არსებობდეს. ინფორმაცია ამის შესახებ ორგანიზაციის ახალი ვებსაიტის მეშვეობით გახდა ცნობილი.

აღსანიშნავია, რომ მიუხედავად ზემოაღნიშნულისა, ამ საკითხთან დაკავშირებით პოლიტიკური პარტიების მოსაზრება ორი მიმართულებით გაიყო.

ერთნი მიიჩნევენ, რომ უნდა არსებობდეს მხოლოდ მიზნობრივი სახელმწიფო დაზღვევა (მათთვის, ვისაც არ აქვს კერძო დაზღვევის შეძენის შესაძლებლობა), რომელიც მედიკამენტების ანაზღაურების კომპონენტსაც უნდა ითვალისწინებდეს. ამ მოსაზრებას იზიარებენ ენმ, ეროვნული ფორუმი, თავისუფალი დემოკრატები, მრეწველები და დემოკრატიული მოძრაობა - ერთიანი საქართველო.

ხოლო გირჩი და რესპუბლიკელები განმარტავენ, რომ უნდა არსებობდეს მხოლოდ მიზნობრივი სახელმწიფო დაზღვევა (მათთვის, ვისაც არ აქვს კერძო დაზღვევის შეძენის შესაძლებლობა), მედიკამენტებთან დაკავშირებით კი ისინი არაფერს ამბობენ.

საერთაშორისო გამჭვირვალობა - საქართველომ ახალი ვებსაიტის, Chemikhma.ge-ს პრეზენტაცია დღეს გამართა. საიტზე შესული მომხმარებელი კითხვარს ავსებს, შემდეგ კი თავის პასუხებს სხვადასხვა პოლიტიკური პარტიის მიერ გაცემულ შესაბამის პასუხებს ადარებს, რომლებიც, თავის მხრივ, მათი საარჩევნო პროგრამების მიხედვითაა შევსებული.

კითხვები კატეგორიებად არის დაყოფილი, რომელშიც შედის სოციალურ-ეკონომიკური, გარემოსდაცვითი, საშინაო, ჯანდაცვის, საგარეო პოლიტიკისა და განათლების საკითხები. როდესაც მომხმარებელი კითხვარის შევსებას ასრულებს, მისთვის ნათელი ხდება, თუ რომელი პოლიტიკური პარტიის საარჩევნო პროგრამასთან აქვს თანმხვედრი შეხედულებები.

აღსანიშნავია, რომ TI-ის თხოვნის შესაბამისად, კითხვარი მხოლოდ 7-მა პარტიამ შეავსო. რაც შეეხება მოძრაობას პაატა ბურჭულაძე - სახელმწიფო ხალხისთვის, საქარველოს კონსერვატიული პარტიას, ლეიბორისტულ პარტიასა და პატრიოტთა ალიანსს, მათ კითხვარის შევსებისგან, სხვადასხვა მიზეზის გამო, თავი შეიკავეს.

კითხვარის შევსებაზე უარი ქართულმა ოცნებამაც თქვა.