შინაგან საქმეთა სამინისტრომ ზესტაფონში მომხდარ მკვლელობაზე ერთი პირი დააკავა. უწყებაში On.ge-ს განუცხადეს, რომ საქმის დეტალები ჯერჯერობით მათთვის უცნობია.

როგორც პირველი არხი წერს, მკვლელობა ავტოსადგომზე დასაქმებულებს შორის თანხის განაწილებასთან დაკავშირებით მომხდარ ინციდენტს მოჰყვა. მათივე ინფორმაციით, ერთმა პირმა კაცს თავში რკინის ნაჭერი ჩაარტყა, რის შემდეგაც ის ადგილზე გარდაიცვალა.

საქმეზე გამოძიება საქართველოს სისხლის სამართლის კოდექსის 117-ე მუხლის მეექვსე ნაწილითაა დაწყებული. აღნიშნული მუხლით, ჯანმრთელობის განზრახ მძიმე დაზიანება, რამაც სიცოცხლის მოსპობა გამოიწვია, ისჯება თავისუფლების აღკვეთით რვიდან თერთმეტ წლამდე.