საქართველოს თავდაცვის სამინისტროში აცხადებენ, რომ ამერიკის შეერთებული შტატების უსაფრთხოების მრჩეველის, ჯონ ბოლტონის შესახებ გავრცელებული ინფორმაცია ყალბია. როგორც On.ge-ს უწყებაში განუცხადეს, სტატია იმის შესახებ თითქოს ბოლტონი საქართველოს თავდაცვითმა შეიარაღებამ შეაშფოთა დეზინფორმაციული ვებგვერდით გავრცელდა.

უწყებაში ამბობენ, რომ გვერდი რამდენიმე დღის წინ შეიქმნა და პირველი სტატიაც ოქტომბერში გამოქვეყნდა. სხვა საკითხებზე უწყებაში ამ არ საუბრობენ. მათი თქმით, აღნიშნულ საკითხზე ხვალ სამინისტროში ბრიფინგი გაიმართება.

ინფორმაცია ჯონ ბოლტონის შეშფოთების და საქართველოსთან პარტნიორობის გაწყვეტის საფრთხის შესახებ დღეს, 31 ოქტომბერს გავრცელდა. ვებგვერდის დომეინი 2018 წლის 22 ოქტომბერს დარეგისტრირდა და მასზე სულ რამდენიმე მასალაა გამოქვეყნებული.

ფაქტი უარყო აშშ-ში საქართველოს საელჩომ და განაცხადა, რომ ეს არის ქვეყნებს შორის სტრატეგიული პარტნიორობის გაფუჭების მცდელობა.