ქართული ოცნების გენერალური მდივანი, კახა კალაძე მიიჩნევს, რომ არჩევნებიდან მესამე დღეს სალომე ზურაბიშვილის მიერ გავრცელებული განცხადება დაგვიანებული არ არის. ამის შესახებ მან დღეს, 30 ოქტომბერს პრეზიდენტობის კანდიდატის შტაბში გამართული ბრიფინგის შემდეგ ჟურნალისტებთან განაცხადა.

კალაძემ თქვა, რომ კანდიდატმა განცხადება გაავრცელა მაშინ, როცა საჭირო იყო. იგი განმარტავს, რომ რთული წინასაარჩევნო პერიოდის შემდეგ ხალხი გადაიღალა და დასვენება სჭირდებოდათ:

"ძალიან რთული იყო პირველი ტური, რამდენიმე თვის განმავლობაში მიდიოდა საარჩევნო კამპანია. ელემენტარულია, რომ ადამიანი გადაიღალა, ხო? უამრავი შრომა ჩაიდო. დღეს გაკეთდა განცხადება, ხვალიდან ვიწყებთ მუშაობას".

დღევანდელ საგანგებო ბრიფინგზე მმართველი პარტიის მხარდაჭერილმა კანდიდატმა დაადასტურა, რომ მეორე ტურში მონაწილეობას მიიღებს. ზურაბიშვილის თქმით, გრიგოლ ვაშაძესა და რუსეთს არ დაუთმობს ქვეყანას და თანამებრძოლებს არ მიატოვებს შუა გზაში.

ზურაბიშვილმა განაცხადა, რომ ბრძოლისთვის მზადაა. მისივე თქმით, "კახელიცაა და მეგრელიც" და ამიტომ ბოლომდე წამსვლელია. მან მადლობა გადაუხადა ამომრჩეველს, აქტივისტებს, მხარდამჭერებს და განაცხადა, რომ პირველ ტურში პირველი ადგილიც გამარჯვებაა.

ზურაბიშვილის გზა მეორე ტურამდე

სალომე ზურაბიშვილის საპრეზიდენტო კანდიდატად დარეგისტრირების შემდეგ ოპოზიცია და სამოქალაქო საზოგადოება აქტიურად განიხილავდა დაუჭერდა, თუ არა მას მხარს ქართული ოცნება. გავრცელებული ინფორმაციით, ეს საკითხი გუნდში განხეთქილების მიზეზად იქცა, რაც რამდენიმე თვის შემდეგ პარტიის ლიდერმა, ბიძინა ივანიშვილმა დაადასტურა კიდეც. ეჭვების მიუხედავად, საბოლოოდ, ზურაბიშვილი ოცნების რჩეული კანდიდატი გახდა.

საარჩევნო კამპანიის დროს მისმა განცხადებებმა აგვისტოს ომზე, მარიხუანის ლეგალიზაციასა და ავლაბრის რეზიდენციაზე, როგორც საზოგადოების, ასევე პოლიტიკოსების და ეკლესიის მხრიდან კრიტიკა დაიმსახურა.

ზურაბიშვილს აკრიტიკებდნენ არასამთავრობო ორგანიზაციებიც, თუმცა საპასუხოდ მათ კანდიდატის და ხელისუფლების მხრიდან თავდასხმის მოგერიება მოუწიათ. პრეზიდენტობისთვის მებრძოლი კანდიდატი კრიტიკული და ცინიკური იყო მედიის მიმართაც.

მისი კამპანიის დროს აქტიურად განხილვადი იყო შემოწირულობებიც, რადგან მან კოკა-კოლის, არქი ჯგუფის, ანაგის, ღუდუშაურის კლინიკის, ქართუ ბანკის, თეგეტას, აისის და სხვა ცნობილი კომპანიების წარმომადგენლებისგან მილიონზე მეტი ლარის შემოწირულობები მიიღო. ამას ერთვებოდა ხელისუფლების წარმომადგენლების ირაკლი კობახიძის, ეკა ბესელიას, გია ვოსლკის, კახა კალაძის და სხვათა დიდი ოდენობის შემოწირულობები.

მიუხედავად ყველაფრისა, კანდიდატი, ისევე როგორც მისი მხარდამჭერი პარტია დარწმუნებული იყო, რომ მას კონკურენტი არ ჰყავდა და არჩევნების მოგებას შეძლებდა. ზურაბიშვილი საუბრობდა იმაზეც, რომ მის წინააღმდეგ წარმართული კამპანია არაევროპული და არაჯანსაღი იყო, რადგან ქალ კანდიდატს ესხმოდნენ თავს.

კამპანიის დროს მმართველი გუნდის წევრები აცხადებდნენ, იმასაც რომ ზურაბიშვილი პირველივე ტურში მოიგებდა და მეორე ტურის ჩატარების ალბათობა მცირე იყო, მაგრამ იქაც კი ზურაბიშვილი იქნებოდა ლიდერი.

ამის დასტურად ხელისუფლების წარმომადგენლებმა არჩევნების დღეს გამოქვეყნებული, მათ დაკვეთით ჩატარებული ეგზიტპოლის შედეგებიც გამოიყენეს, სადაც ზურაბიშვილი 53%-ით ლიდერობდა. პარალელურად ჩატარებულ სხვა ეგზიტპოლებში ზურაბიშვილს საერთო ხმების 40 და 34 პროცენტი ჰქონდა.

თავად კანდიდატმა ეგზიტპოლის შედეგების შემდეგ განაცხადა, რომ ბედნიერი იყო, თუმცა "ფრთხილად". მისი თქმით, ცესკოს საბოლოო შედეგების გამოცხადების შემდეგ იზეიმებდა.

თუმცა, ცესკოს პირველადი შედეგების გამოქვეყნების შემდეგ ზურაბიშვილის საარჩევნო შტაბთან გამზადებული სცენა დაშალეს და კონცერტიც გადაიდო. თავად ზურაბიშვილმა კი ორი დღის განმავლობაში ამ საკითხზე არ ისაუბრა. ჟურნალისტების კითხვაზე რას აპირებდა კანდიდატი, მან უპასუხა "როცა დაგიბარებთ, მაშინ გიპასუხებთ".

ამ დღეების განმავლობაში შეიცვალა ხელისუფლების რიტორიკაც. მაგალითად, დეპუტატმა ანრი ოხანაშვილმა განაცხადა, რომ ზურაბიშვილს ჟურნალისტების მიმართ მეტი პატივისცემა უნდა ჰქონდეს. ქვეყნის პრემიერ-მინისტრმა კი თქვა, რომ ქართული საზოგადოებისგან შეცდომებზე მკაფიო გზავნილი მიიღეს. ქართული ოცნების გენერალურმა მდივანმა, კახა კალაძემ კი აღნიშნა, რომ ხელისუფლებას ჰქონდა გადაჭარბებული თავდაჯერება და არ ჰქონდა საკმარისი კომუნიკაცია საზოგადოებასთან.